SAC dispuesto pa topa gobierno mitar caminda

ORANJESTAD - Stichting Arubaans Carnaval (SAC) ta topa gobierno 'mitar caminda' pa trece solucion na e impasse cu e gruponan di carnaval. Diamars mainta nan a manda un carta pa minister di Turismo y Cultura Otmar Oduber, indicando cu nan ta dispuesto pa concedi 5 miembro di gruponan uni y 3 di gobierno, un lugar den directiva di SAC. Mas cu esey nan no por duna, segun presidente di e fundacion carnavalesto, Tecla Kelly, a splica NoticiaCla.com diamars atardi. Esaki ta e contesta 'basico' cu Kelly y su fundacion a manda pa Oduber. "E carta mes ta hopi largo" Kelly a bisa NoticiaCla.com. No ta posibel pa tur e 19 miembronan di e grupo uni forma parti, y como tal a bay di acuerdo pa duna e cantidad menciona. Kelly no a tende di gobierno ainda diamars atardi, pero tabata en espera di un contesta. Si gobierno no acepta e contesta di SAC, ta nifica cu gobierno por tuma paso pa asina kita e permiso di SAC pa organisa carnaval proximamente pa Aruba. 

E problema a cuminsa siman pasa ora cu SAC a haya tende di gobierno cu nan tin te diamars pa fiha nan punto di bista riba e impasse cu tin cu e gruponan Uni di carnaval, sino saca nan conclusion. NoticiaCla.com a tuma contacto cu e minister pero no tabata exitoso ainda.