Varios avion di InselAir Aruba geground na Corsou

WILLEMSTAD/ORANJESTAD - Algun avion di e flota di InselAir Aruba a keda geground pa departamento di avion civil di Aruba e siman aki na Corsou. Fuentenan fidefigno di NoticiaCla.com a confirma esaki diahuebs merdia pa e portal aki, indicando cu ta mas cu un avion, y cu ta pa motibo di incidentenan cu a sosode cu e avion(nan). "Ta normal cu ora cu avionnan haya nan mes den incidentenan (chikito of grandi), nan ta wordo geground mesora). No ta importa unda nan ta", e fuentenan a sigura e portal aki. 

MAS AEROLIÑA Y FRECUENTE

No por a bisa ki tipo di incidente a sosode, pero si cu ela sosode cu 'mas cu un avion di e aeroliña', y tambe cu dentro di poco lo 'release' e avionnan ora cu tur cos ta ok atrobe. Mes momento a mustra cu ta cos cu ta sosode cu mas aeroliña. De hecho hasta aeroliña mas grandi cu ta haya nan mes den situacionan asina y cu ta ground e avionnan. Solamente cu e no ta bin den prensa, y como tal ta kere cu esaki no ta sosode. 

REACCION AEROLIÑA

E portal aki a busca reaccion di e proximo CEO di InselAir Aruba Stephan van Spaandonk, pero e no a reacciona. A haya reaccion di miembro di gerencia di InselAir International Edward Heerenveen. Segun Heerenveen, a splica cu e "situacion ta cu nan kier controla cu tur cos ta wordo haci door di nos pa cu siguridad di buelo". Ademas Heerenveen a bisa "nos no tin niun problems y mi ta kere cu awe mes nan lo conclui cu nos ta supersafe". "Ken a ground, Corsou of Aruba of esun a bisa e otro no ta conoci. Pero avionnan ta di Aruba dus di aya e orden por bini" Heereveen a finalisa bisando. NOTA: E potret di archivo di NoticiaCla.com no ta necesariamente e avionnan cu ta geground, sino un bista di avionnan di e aeroliña staciona si na aeropuerto di Corsou.