Polis man yen cu fanaticada di Colombia despues di wega

ORANJESTAD – Manera cu wega di futbol entre Colombia y Brazil a termina na Brazil (Brazil a gana e partido 2-1) diabierna atardi, polisnan a subi caminda y cuminsa aplica Faya bo Haya ora cu tabata necesario. Rapidamente por a nota cu un biaha mas polis tabatin nan man yen cu personanan cu camisa di e ekipo di Colombia, cu tabata causa disturbio. Na Seaport tabatin un caso di maltrato cu bate, pero e persona a core bay. Ora cu a polis a bay su tras, a resulta cu tin mucho hende mescos bisti y cu ta imposibel pa localisa e persona. Mas caminda tabatin hendenan cu e camisa di Colombia riba caminda grandi cu bandera y otronan cu tabata supuestamente molestia automobilistanan pasando. Polisnan a mustra cu nan lo no tolera nada y cu nan ta baha man duro mescos cu tempo di carnaval.

Polis e siman aki a anuncia caba cu nan lo a bay actua cu man duro durante e ultimo siman di copa mundial di futbol, mirando kico a pasa siman pasa despues di e wega di Colombia y Uruguay. Esey a pone cu polis no a basila y a opta pa mesora hinca un plan den otro, y aplica e ley di ‘lik op stuk’ osea Faya Bo Haya.