Testcase pa derecho di voto pa Tweede Kamer rechasa

DEN HAAG - Raad van State diaranson a rechasa e peticion pa habitantenan di Aruba Corsou y St Maarten vota den eleccion di Tweede Kamer. Manera ta conoci, Raad van State mester a dicta su desicion awe despues cu un siman pasa abogadonan Dello Gomez y Andin Bikker a bringa nan caso. Bikker den un comunicado diaranson anochi, a yama e desicion uno 'cu ta laga hopi di desea', mirando cu 'Raad van State a keda para riba su desicion den e caso cu Ministernan Sevinger y Eman a hiba na 2006, pretendiendo cu nada no a cambia y pues no kier a honra e demanda pa derecho di voto pa Tweede Kamer'. Bikker a sigura cu lo sigui cu e lucha apelando na Corte pa Derechonan Humano. 

RECHASO 

E desicion di e test case ta confirma cu e chensnan ta 'casi nulo' cu derecho pa vota pa Tweede Kamer lo wordo duna pa e islanan den Caribe Hulandes un dia. Tres hues di e Raad van State a haya e peticion 'infunda'. E caso nobo, como 10 aña despues, a wordo entama pa mr. Andin Bikker y mr. Dello Gomez, conoci pa hiba otro casonan di prueba di impacto grandi. Andin Bikker: "Di experiencia nos sa cu ora bo haci test case hopi biaha bo no ta logra di biaha y bo tin pa sigui procedeer (pa habri e mercado di telecomunicacion a procedeer mas cu 4 aña). Segun Bikker, un caso similar a wordo hiba na 2006 sin exito pa actual Ministernan Sevinger y Eman, pero nan (Bikker y Gomez) argumento tabata ta cu desde 2010 e situacion a cambia, por ehempel a forsa via un protocol di 2015 cu Aruba mester a introduci ley di CAFT y si no haci'e lo impone un "KB", sin cu e habitantenan di Aruba tin algo di bisa pa cu e constelacion di Rijksministerraad, cual desde 2012 ta wordo forma dor di Tweede Kamer. Ademas te cu dia di awe no ta existi un geschillenregeling amplio. Tambe desde 10-10-10 a duna derecho di voto na habitantenan di islanan BES, sin cu por bisa cu BES ta partí integral di Hulanda (e leynan di BES ta ful diferente cu Hulanda). P'esey nos tabata tin speransa cu Raad van State lo a duna un opinion profundo riba e tematica cu Gobierno di Reino ta mete den asuntonan interno mas y mas sin cu habitantenan di Aruba, Corsou y Sint Maarten tin algo di bisa pa cu e constelacion di e organo aki y den ausencia di un geschillenregeling". Ta incomprendibel pa Bikker cu Raad van State ta di opinion cu desde e caso di Eman c.s. di 2006 nada no a cambia. Pues manera Bikker a anuncia desde inicio di e caso na november 2016 lo sigui cu e lucha apelando na Corte pa Derechonan Humano. Lesa e sentencia di Raad van State aki