Airport hotel ta complementa aeropuerto sin mas

ORANJESTAD - "E proyecto hotelero na aeropuerto lo complementa e operacion di aeropuerto". Asina gerente di aeropuerto Reina Beatrix Jamez Fazio a comenta na Noticiacla.com. Nan ta contento mirando cu ta trata di un tereno cu no ta desaroya, y cu esaki awor e ta cambia e ambiente total rond di aeropuerto. "E area lo mustra mas moderno, mas desaroya y ta crea hopi trabou" Fazio a sigui bisa di e hotel di apenas 116 camber. "E ta sirbi un buraco interesante, manera tripulantenan, comerciantenan, pasahero cu problema di buelo etc. Nos ta sostene e proyecto totalmente" e gerente a sigui bisa. 

ROL DI AEROPUERTO 

Djies e hecho cu ta desaroyando e area, ta yuda aeropuerto. "Si bo wak e area rond di aeropuerto, e no ta hopi compatibel cu desaroyo residencial. Hende no kier biba cu un pista di aterisahe patras di nan cura". Como tal, mester tin un desaroyo comercial, y e ta un posibilidad perfecto pa un area no desaroya. De hecho, segun Fazio, pa hopi aña tabata den e plan maestro di aeropuerto pa esaki keda desaroya. No necesariamente pa aeropuerto, pero si di un cierto forma e mester a tuma lugar. "E hotel aki ta un comienso di esaki". 

HOTEL MESTER TENE CUENTA CU KICO

Ora cu tin un hotel banda di un aeropuerto, mester tene cuenta cu aspectonan tecnico. Algo cu segun Fazio, e compania Pelka (construccion y desaroyo di e proyecto) a tene cuenta cu ne durante e ultimo aña. "Un di nan ta e haltura di e hotel, y mester tene cuenta cu e area di pista di aterisahe no por ta obstaculisa. "E hotel ta cumpli cu e rekisito ey tambe". E hecho cu e hotel ta 7 piso halto, ta pone cu mester a sigura cu e forma cu e ta traha, no ta impedi cu e limitacion y e hotel a cumpli cu esaki tambe. A traha un liña cu ta mustra cu mas leu bo ta di e pista di aterisahe, mas halto e hotel por ta. Pues den e forma ey e lo wordo construi tambe. 

Tambe tin e loke ta wordo yama 'storm weather runoff'. Esey ta e parti di naturalesa y tempo. E area ta conoci pa ta wanta awa durante yobida. A traha cu e desaroyo cu e hotel no ta stroba e pasada di awa pa e aeropuerto ni bisindario. Trafico tambe tabata un asunto cardinal, unda cu a haci un estudio riba e infrastructura rond di e area. 

Tur esaki a keda regla y incorpora pues no mester tin ningun problema. Un di e preocupacionan tabata si tur e trafico pa e hotel, lo mester a pasa dilanti aeropuerto. Algo cu no ta posibel mirando e trafico pisa cu tin riba cierto momentonan. 

EFECTO DI HOTEL RIBA AEROPEURTO

Fazio no ta kere cu e localidad di e hotel lo trece mas 'trafico' pa aeropuerto. E ta bon si pa Aruba mirando cu hendenan comercial por haci hopi bon uzo di e facilidadnan comercial y esey por of no, mas trafico entre islanan pa Aruba. "Por ta unda cu e por yuda, ta si e comerciantenan y tripulantenan di aeroliñanan no keda mas den e hotelnan tradicional, pero cuminsa uza esun na aeropuerto. Esey ta yuda e hotelnan tradicional di libera mas camber pa turistanan regular cu ta bin Aruba pa vacacion. "Pero pa nos mes, e no tin mucho efecto pa trafico, los cu e ta complementa e operacion di aeropuerto.''