Jeroen Pauw: Sa semper ken bo ta den e grupo

ORANJESTAD - Ora cu bo ta un periodista conoci, bo mester sa semper 'ken bo ta den e grupo y tene cuenta cu esey'. Periodista renombra Hulandes Jeroen Pauw ta papia asina di e popularidad cu e tin como periodista, y con esaki a bay recientemente na Aruba. Pauw tabata na Aruba recientemente como instructor invita pa UNESCO su Media Pressure Cooker session pa prensa y invitadonan.

DIFERENCIA PERIODISTA DI ARUBA Y CORSOU

Pauw a nota un diferencia entre periodistanan  di Aruba y di Corsou. Por lo menos esnan cu el a traha cu ne. Pauw tabata na Aruba recientemente como instructor invita pa UNESCO su Media Pressure Cooker session pa prensa y invitadonan. Aki Pauw a tene varios session y a haya un sentido con prensa na Aruba (esnan presente) ta actua y traha. 

"Mi a nota cu periodistanan na Corsou ta mas 'wild' compara cu Aruba" Pauw a bisa. Nan ta haci mas 'buya'. Mester bisa mesora si cu no tur periodista a presenta e session, pues a husga netamente esnan presente. Ora cu a combersa cu Pauw, tabata na comienso di e session y como tal e no por a duna un bon indicacion ainda di e calidad. Pero na final, Pauw a keda masha impresiona cu e calidad cu el a mira desplega den apenas algun dia. 

PAISAHE PERIODISTICO Y CON PA ENTREVISTA

Entre e sessionan cu Pauw a conduci tabatin e parti unda cu ta discuti e paisahe periodistico na Aruba, compara cu resto di mundo. Similaridad y diferencianan y con un periodista mester anda cu esaki. Si e ta haci e trabou di e periodista mas dificil si of no. Con un periodista ta deal cu cierto aspectonan, y kico tur e tin na su disponibilidad pa por haci su trabou. Na Aruba nos ta 'superman' unda cu tur hende ta haci tur cos mientras cu den exterior hopi biaha cada persona ta specialisa riba un tereno so. Esey por tin su beneficio y problema. Tambe a atende e tecnica di entrevista un persona. Kico tur mester tene cuenta cu ne, y con tin cu atende cu esey. Notabel ta cu varios periodista conoci cu a atende e curso, a haya nan mes cu sorpresa y a nota cu tin hopi cos cu por cambia. E hecho di ta cu un persona popular como idolo periodistico a hunga un rol sigur. Pero Pauw mes a admiti cu ora cu ela bay haci un entrevista cu un colega (di N.O.S), e mes a faya algun biaha. Pues ta formanan con pa anda den caso di un entrevista y con pa prepara bo mes miho pa esaki. Na tur, sessionan sumamente valioso y mira cu otro wowo. Periodistanan experencia a admiti cu no obstante nan experiencia, e tabata momentonan sumamente interesante y educativo. 

STATUS DI CELEBRITY DI PAUW UN PROBLEMA?

Notabel tabata e hecho cu mirando e popularidad di Pauw, hopi tabata intimida, of entusiasma pa por deal cu e persona. Algun a mir'e como nan role model, y otronan a confesa cu nan a bay 'pasobra mi kier topa Jeroen Pauw'. Pauw mes no por a bisa si esey a influencia nan prestacion. "Esey bo no sa nunca exacto. Pero mi no ta kere cu mi ta un celebridad na Aruba" Pauw a bisa. Ela duna como ehempel cu ela bay dal algun drinks cu algun colega na Aruba y no a nota nada di un status di celebridad, den sentido cu hendenan no a echt reconoce. "Ora cu bo tin un cierto sentido di popularidad, cu mi sa cu mi tin na Hulanda, e ora mi sa cu ora cu mi bay coy gasolin, cu e persona cu ta atendemi sa ken mi ta" Pauw a sigui bisa. Ora cu e cumpra un potchi verf, esun cu ta bende ta nota mesora ken e ta y ta haci comentarionan interesante.

CELEBRITY TA HACI MUNDO MAS SERVICIAL

 "Mi ta realisa cu e ta parce asina cu e mundo ta mucho mas servicial cu e ta en realidad", e periodista a bisa. Como un anecdota pret e ta mustra cu e persona cu ta bende e potchi verf, ta bisa p.e. "Ah, meneer kier un color blanco. Netchi color no? siendo cu e ta simplemente un color blanco. Con bunita blanco por ta? Of ora di tank, nan ta bisa: Wel meneer Pauw, bo tanki ta completamente yen atrobe. Eynan mi ta haya sa cu nan conoce'mi y tambe cu nan no ta trata tur hende asina" Pauw ta sigui bisa. Pauw ta un periodista veterano cu actualmente ta modera su propio talk show popular 'Pauw'. Prome cu esey e tabata co host di e talkshow mas popular di Hulanda "Pauw & Witteman" y prome cu esey e tabata presentador di noticia di NOVA. Ademas e tin un compania di produccion. Por mira Pauw riba television Hulandes atrobe entrante 23 di februari proximo.