Renaissance Marketplace ta celebra bispo di Dia di Betico

ORANJESTAD – E centro comercial ta preparando pa ofrece dia 24 di januari proximo un anticipo digno na e celebracion di Dia di Betico. Grandi y chikito, local y bishitante ta bon bini na e restaurant y tienda nan di Renaissance Marketplace, pa deleita cu e zonido, bista y smaak di nos dushi Aruba. Di e manera aki Renaissance Marketplace kier celebra hunto cu comunidad completo, e fecha natal di nos Libertador Betico Croes cu ta dia 25.Riba e diamars aki, entre 7’or y mey anochi, por encontra na Renaissance Marketplace diferente mesa cu obranan di man cu ta obtenibel, apoyando asina e artesanonan local. Tambe ta bay tin un bunita show di musica y baile presenta pa e agrupacion Rosea Cultural. Pa clausura no tin un miho manera cu e dushi musica tipico cu Betico Croes mes tabata goza un mundo, presenta pa e grupo cu e mes a yuda lanta como tambe e banda “4Ever4”Grupo di Betico lo ta en bibo na Renaissance Marketplace pa cende e mecha diamars anochi di loke ta bay bira un tremendo Dia di Betico. Naturalmente tur restaurant, tienda, y tambe Cine lo ta habri pa bo scoge unda bo kier sinta y cuminsa disfruta di bo dia liber. Y yega for di trempan numa paso na Renaissance Marketplace, parkeo ta gratis. Pa mas informacion di e actividad aki y hopi otro mas, check nos pagina di Facebook www.facebook.com/renaissancemall&marketplace/events .