Romano: Lo adapta maneho di cobransa riba number di auto

ORANJESTAD - E protesta di chauffeurnan di truck a haña oido cerca e mandatario encarga. Nan accion contra e cambio di ley riba pago di number di auto, a pone e mandatario encarga (Angel Bermudez), haci cierto cambio. For di su oficina NoticiaCla.com a haya e siguiente splicacion: "E ley ta keda, pero e ehecucion ta mas flexibel". Ora cu a pidi mas clarificacion, a sigui bisa "Dus si un persona acudi na belastingdienst esaki lo ta posibel te cu un maximo di 4 pago". Mientrastanto a duna departamento di impuesto e orden pa presenta e cambionan proximamente. 

DEPARTAMENTO DI IMPUESTO

For di e departamento di impuesto, NoticiaCla.com a haya confirmacion cu enberdad tin intencion pa trece adaptacion. "Awe Departamento di Impuesto a ricibi e peticion di minister pa traha un nota di maneho" vocero Mervely Romano a confirma pa e portal aki. Consecuentemente segun Romano, e departamento di impuesto ta bay traha un 'beleidsnota general' y e lo wordo presenta na minister. "Despues di aprobacion nos lo informa tur nos clientenan. Nos ta spera di por informa nos clientenan di e nota di maneho otro siman" Romano a sigui bisa. Mientrastanto, e situacion ta 'as is' te ora e nota di maneho ta aproba. For di e vocero, e portal aki a compronde cu Departamento di Impuesto lo percura pa entrega e nota e siman aki mes.

COBRANSA ADICIONAL

Ademas Romano a splica cu no ta intencion di Departamento di Impuesto pa saca cobransanan adicional (naheffingsaanslagen) asina cu 31 di januari pasa. "Departamento di Impuesto ta bay mantene flexibilidad den 2017 y mas den trancurso di aña lo pone e clientenan cu no a paga na altura di ki tempo lo saca e cobransanan adicional. En todo caso nos lo informa e clientenan prome pa nan por haya chens di paga" Romano a sigui bisa. E departamento di Impuesto tin comprension cu aki ta trata di un cambio di ley cu e clientenan no ta custumbra cu ne, y pa duna e clientenan mas espacio pa adapta nan mes na e stipulacionnan nobo, lo mantene un areglo transitorio pa aña 2017. "Entrante aña 2018 lo ehecuta e ley manera e ta" Romano a finalisa bisando.