Esaki no ta e comienso di e final di InselAir Aruba

ORANJESTAD - Contrario na speculacion y rumornan, InselAir Aruba no ta bay cera su porta ni ta muriendo un morto lento. Chief Maintenance Officer (CMO) actual Stephan van Spaandonk a sigura NoticiaCla.com cu nada di esey ta berdad. "This is not the beginning of the end!" (e comienso di e final) Van Spaandonk a sigura e portal aki. Van Spaandonk ta tuma e rienda over fin di luna for di su colega Frederick Nuboer y ta bira CEO entrante 1 di februari proximo. Pa loke ta berdad ta si cu e situacion financiero cu a surgi door di e situacion na Venezuela, a haci e aeroliña hopi daño. No InselAir so, sino tur otro tambe. 

REALISA LAAT 

Van Spaandonk ta admiti cu a dura e compania un tiki pa realisa esey (cu cos tabata bayendo malo), pero unabes cu a realisa e problema a pone cu a cambia full e filosofia di e compania. "No solamente parti financiero y operacional, sino tambe e mindset" van Spaandonk a bisa. Aki ta unda cu e posibilidad di charter a bin aden, pa por e.o. reemplasa e perdida di e mercado Venezolano. "Esey ta un mercado hopi grandi pa nos cu cay afo". Y cu miras riba e financiamento importante di gobierno (aparte di e 3 miyon recientemente traspasa), nan por haci un bon inicio. Y despues di varios reunion cu personal y staff, van Spaandonk ta sinti hopi positivo cu por 'turn e compania around'. "This is not the beginning of the end. Sigur cu no!" e CEO nobo a sigui bisa. "This is the beginning of something beautiful!". 

INSEL AIR DIFERENTE AKI 6 LUNA

Si wak dilanti aki 6 luna, van Spaandonk ta mira un InselAir Aruba diferente, mas stabil, mas confiabel. E ta conciente cu aworaki tur nan clientenan no tin confiansa cu e compania. "Mi ta hopi honesto!. Pero aki 6 luna bo lo mira cu e confiansa t'ey atrobe. Nos lo tin posibel algun ruta nobo, lo tin e charter programa cu lo duna Aruba e chens pa habri e mercado laboral atrobe". Segun e gerente, e separacion di compania (entre Aruba y Corsou) ta dificil, y ta mira cu esaki lo keda InselAir. "Esey ta e desicion cu nos shareholders a tuma. Nos ta sigui cu e rumbo ey. Pero durante conversacion cu Directie Luchtvaart, nos a focus pa InselAir Aruba bay dilanti". Cu esey e kiermen cu e kier operational control. "Nos ta dicidi ki momento y unda e avion ta bay, sea pa cualkier otro cliente (InselAir Curacao). Esey ta e cambio mas grandi cu lo bo wak den e transcurso di 6 luna cu ta bin aworaki.''