ATIA: Diversificacion y inovacion e solucion pa Caya Grandi

ORANJESTAD - Diversificacion y innovacion por ta e solucion pa caya grandi segun e gremio comercial ATIA. E gremio ta haci mencion di cosnan cu a bin pa 'drecha Caya Grandi' pero cu no a logra. Entre nan ta mustra p.e. cu e tram no tabatin efecto desea, comercio tabata dividi riba parkeermeter, habrimento di caya anochi pa trafico no a yuda, y asina tin mas cos cu ATIA ta wak como negativo. 

OPINION DI ATIA RIBA E TEMA

Nan a wordo acerca pa un opinion tocante e situacion di Caya Grandi y ta mustra pues cu esey por ta e solucion. Ta comprendibel segun e gremio, cu e construccion cu a tuma lugar pa mas di dos aña den nos Caya Grandi tawatin su efecto negativo riba e negoshinan den e area directo. Despues di un periodo largo asina di construccion, e ta tuma su tempo pa negoshinan por recupera, pero tambe pa e clientenan custumbra bek di haci compra den e area aki. Manera ta conoci, hopi hende a evita e area aki durante e construccion extenso cu a tuma lugar.

TRAM NO TABATIN EFECTO DESEA

Lamentablemente, e tram cu inicialmente tawata tin como proposito pa trece e turistanan, especialmente esunan cu ta baha for di crusero, den Caya Grandi y asina stimula benta na turista, no ta tin su efecto desea.

COMENTARIO COMERCIO RIBA PARKEERMETER

Tempo cu a bin cu e proposito di parti gobierno pa introduci parkeermeters, ATIA a conduci un encuesta entre un cantidad grandi di comerciante y e resultado tawata dividi 50%-50%, caminda mitar tawata di acuerdo y e otro mitar tawata en contra di e introduccion di parkeermeters. Loke si tawata un comentario di parti hopi comerciante den caya ta cu ya pa 8or di mainta, no ta tin lugar di para auto mas, haciendo cu e opcionan di parkeer pa clientenan bishita Caya Grandi tawata hopi limita.

HABRI CAYA PA TRAFICO

Encuanto e habrimento di Caya Grandi pa trafico durante oranan di anochi, ATIA ta di opinion cu elo no tin efecto riba benta mirando cu den e orarionan aki mayoria negoshi den Caya Grandi ta cera caba. Al contrario, ta di lamenta cu e autonan lo susha e cayanan nobo cu azeta.

SHOPPING MALLS PAFO DI CAYA GRANDI

Otro factor afectando benta den Caya Grandi ta e shopping malls cu a lanta pafor di e area directo di Oranjestad. ATIA ta premira cu e efecto aki lo sigi, mirando cu nos tin entendi cu tin mas shopping malls na caminda.

FREE ENTERPRISE

ATIA ta kere den free enterprise y cu tur negoshi tin nan derecho di opera libremente. Alabes, tin casonan extremo caminda enberdad mester bin cu cierto regulacion, manera por ehempel e negoshinan cu den cantidad grandi ta habri den barionan residencial. Den e caso di un moratorium pa tiendanan pafor di Caya Grandi, ATIA no ta wak esaki como un posibilidad realistico den e cuadro di free enterprise.

REDEFINI CAYA GRANDI

Como ATIA nan ta mira cu mester redefini Caya Grandi. Preferencia di e consumidor di awendia a cambia y lo sigui cambia. Como Caya Grandi mester tuma e preferencianan aki den consideracion, midi kico e consumidor ta desea y pensa riba maneranan moderno y innovativo pa satisface e preferencianan aki. Diversificacion di Caya Grandi tambe ATIA ta wak como un oportunidad. Trece establecimento di cuminda, terrasjes, etc. pa asina atrae mas actividad den Caya Grandi. Ademas, negoshinan lo mester evalua nan variedad di producto y con ta presenta e productonan nan un manera atractivo. E consumidor di awendia ta uno critico y exigente y mester wak con por adapta na esaki pa asina por maximimalisa benta.

ATIA den pasado a forma parti di e plataforma encarga cu Caya Grandi, pero despues cu e plataforma aki a cambia, no a wordo inclui mas. ATIA ta mas cu dispuesto na forma parti di e plataforma aki pa asina traha hunto riba ideanan, monitorea e desaroyonan di cerca y asina hiba nos Caya Grandi dilanti.