Van Spaandonk ta reemplasa Nuboer na InselAir Aruba

ORANJESTAD - Entrante 1 di februari proximo, Stephan van Spaandonk ta tuma rienda di InselAir Aruba como CEO, despues cu Frederick Nuboer retira. Nuboer a anuncia su retiro siman pasa, y a haci esaki a base di palabracion haci for di aña pasa manera cu NoticiaCla.com a compronde caba. "Awor nos a yega na e punto caminda cu mi mester a pensa over di management" Nuboer a sigui bisa. Aki e desicion a cay pa reduci e management di 3 na 2 persona. "Den consentimento mutuo, ami a dicidi cu mi ta pone mi posicion disponibel na compania y bay laga e compania" e CEO a bisa e portal aki awe mainta. 

PAKICO AWOR 

Contrario na pensamento cu e (Nuboer) ta bula afo prome cu cos bira 'mas pior' y cu e bay 'down' cu e compania, e CEO saliente ta mustra cu e ta positivo. "Esaki ta un move planea caminda cu e compania por haya espacio pa e stapnan cu mester wordo tuma pa pone e compania bek caminda e mester ta. Dus no ta cuestion cu e ta bula afo prome cu e compania 'bay down'. De hecho colega van Spaandonk a bisa cu esey ningun momento ta e caso (lesa otro articulo), y cu InselAir Aruba lo keda opera, contrario na pensamento cu e compania lo ta muriendo un morto lento. 

MENOS HEFE DEN FUTURO 

Nuboer a mustra cu manera cu ela confirma na e portal aki recientemente, e compania ta bayendo den direccion di charter, y aki no mester di 3 hefe sino 2. "A sali na afo cu mester di dos chief officer pa handle e compania y no tres". E otro dos personanan ya ta chief officers, cada uno den nan capacidad. Van Spaandonk ta Chief Maintenance Officer, y Lutico Hermans ta Chief Operations Officer y nan lo keda, mientras cu Van Spaandock ta haya e titulo tambe di CEO.

FUTURO DI NUBOER

Mientras cu entrante 1 di februari Nuboer ta baha di funcion di CEO di InselAir Aruba, e ta keda un luna mas como consehero y rond af tur cos y despues ta keda na disposicion di compania pa cualkier cos. 

FUNCION CONFLICTIVO DI NUBOER

Un di e criticanan cu Nuboer a haya recientemente ta e situacion financiero cu e compania a hay'e den dje door di no traspasa fondonan di e.o. belasting manera mester ta. Esaki a haya extra atencion mirando e funcion cu Nuboer tabatin den pasado na departamento di belasting como inspector, y como tal e lo mester ta sa miho pa cumpli cu belasting y no 'keda sin paga esaki'. Ademas a cuestiona e hecho cu ela ocupa e funcion mientras cu e tin un top functie tambe den algemene rekenkamer. NoticiaCla.com a confronta Nuboer cu e ponencia aki tambe. Segun Nuboer, for di comienso a dicidi cu e CFO (Chief Financial Officer) lo a atende e asuntonan di e.o. belasting. "E no tabata mi responsabilidad. E tabata algo cu nos a yega na un acuerdo na dje na 2011, cu elo a cay nunca pa mi persona, pero pa e CFO". Nuboer a confirma cu recientemente ela aclaria esaki tambe den Parlamento, cu tambe a cuestiona e asunto aki. "Nan ta sigui cu e informacion ey. Y nos tabata semper transparente cu departamento di impuesto y minister di finanza riba esaki. Tin acuerdonan firma tambe con ta bay soluciona e problema aki" Nuboer a bisa. Pero cuestion cu no lo a paga e belasting, no ta e cuenta. "Intencion semper lo keda cu e compania kier paga e impuesto cu e debe", Nuboer a bisa. Pa loke ta e otro funcionnan cu e ta eherce na banda, Nuboer a bisa cu den cuadro di e petchi cu e tin bisti na e momentonan ey, tin cu wanta esey separa. E otro funcion (na Algemene Rekenkamer), y e ta bisa cu e ta un part time job y no un full time job. "Djies pa ta duidelijk", Nuboer a finalisa bisando.