Cano: Airport hotel lo ta mas cu solamente hotel

ORANJESTAD - Un aña mas laat cu programa, e airport hotel lo keda cla pa september 2018. Asina e inversionista di e grupo Pelca Development Luis Cano a confirma pa NoticiaCla.com. Diabierna ultimo a tuma lugar e ceremonia di e groundbreaking di e proyecto cu ta balora na un poco mas di 30 miyon dollar (e prome fase). E construccion di e proyecto lo tuma 18 luna. Cano no kier referi na e proyecto como solamente un hotel, sino mas bien un centro di negoshi. "Lo bay tin toren di edificio, area comercial y un hotel. Y den un di dos etapa, lo tin un centro di conferencia pa cualkier comerciante por disfruta di dje" Cano a sigui bisa. 

CENTRO DI NEGOSHI

Pa Cano, e ta un compleho di actividad desplega den un area completo. Un actividad ta yama otro actividad y asina tur cos ta keda den un solo tereno. Como ehempel, Cano ta mustra riba p.e. un entrenamento pa un aeroliña. E grupo mester di un centro di entrenamiento, un lugar pa nan hospeda, un lugar pa come, y asina ta sigui splica con tur cos lo funciona hunto. Ademas segun Cano, a demonstra cu un airport hotel ta mas cu solamente esey, y mayoria bes

ta acopla cu un centro di negoshi. 

HYATT PLACE

A scoge e cadena hotelero Hyatt Place pa su formato di operacion. "E ta bay ta un poco mas halto cu e servicio 'regular' di un Hyatt Place" Cano a sigura e portal aki. Pa esun cu no conoce e concepto di un Hyatt Place, Cano ta splica cu e ta un tipo di hotel di negoshi, cu ta bin pa un dia, y ta bay. Nan generalmente no ta uza restaurant, sino mas bien facilidadnan liher. Den e caso aki sinembargo, e huesped por disfruta di un zona comercial, tin restaurant, tienda y disfruta di e servicio di e hotel. Ora cu e proyecto keda cla na 2018, esaki ta encera e hotel y e centro di negoshi. 

INFRASTRUCTURA DI AEROPUERTO

Ora cu a traha e plan, a tene cuenta cu tur aspecto di infrastructura, incluyendo e proyeto di green corridor, y e parti existente banda di aeropuerto. Pa loke ta e cercania di un aeropuerto, tin semper e preocupacion si e ta interveni cu e operacion di e aeropeurto. "Den e caso aki nos tin tur e permisologia na ordo. Unda cu nos ta, tur cos a wordo aproba incluyendo aeropeurto. De hecho nos tin reunionnan un biaha pa luna entre nos, aeropeurto pa ta na altura di tur cos cu ta e construccion, incluyendo e haltura di e hotel. Ta papia di 7 piso, aunke e hotel no ta cay den aproximacion di e aeropuerto pues no ta stroba e operacion di avionnan cu ta yega y bandona nos isla. "Nos no ta pasa e bista di e toren di control, cu ta e parti principal".