De Meza: Informacion di 4000 camber extra no ta corecto

ORANJESTAD - Gobierno dentro di poco lo sali bin afo y bisa cuanto camber extra di hotel lo bin acerca. De Meza no ta cla pa duna e cifra exacto, pero ta desmenti e cifra di 4000. "Cu tin algun opcion, si, pero no a cristalisa den algo concreto. E airport hotel cu ta cuminsa construccion awor, ta e prome hotel cu ta cay oficialmente bou di gabinete Mike Eman II. Tur otro proyecto hotelero otorga, tabata prome cu e tempo di e gabinete segun minister nobo di turismo Mike de Meza a splica NoticiaCla.com. E pregunta a bin a raiz di e remarke di e ex minister Otmar Oduber cu a cuestiona e cifra di 4000 camber di hotel cu mester bin acerca. 

SITUACION ACTUAL

Berdad ta tambe cu tin hotel cu kier expande, mientras cu otronan kier haci hopi renobacion. Algo cu gobierno ta encurasha segun e mandatario. Pero ta mirando e efecto cu esaki por tin riba e mescla di hotelnan na Aruba y e peso cu e ta pone extra riba nos infrastructura. 

SPECULACION RIBA EXPANSION

E speculacion ta grandi pasobra mientras cu tin varios rumor y informacion, no ta cosnan cu a wordo confirma y acorda segun e mandatario. "Opcion tin hopi. Inversionista ta bin Aruba y ta pidi opcion pa algo. Ora cu bo haya un optie, no necesariamente kiermen cu bo ta bay ehecuta e proyecto. Ni di bo banda ni di banda di gobierno" de Meza a bisa. Ex minister Oduber a lansa algun informacion den siman cu a pasa, argumentando cu tin por lo menos 4000 camber cu ta poni pa bin extra y cu esaki no ta responsabel y contra planificacion. De Meza cu esaki ta desbarata e informacion y ta mustra cu e informacion aki ta incorecto. Foto cortesia Hyatt Place Indiana.