Justin Timberlake, Shakira y Phil Collins riba lista pa CNSJ 2015

WILLEMSTAD – Justin Timberlake, Phil Collins y Shakira ta algun di e nombernan di artista cu por ta riba tarima pa e Curacao North Sea Jazz di 2015. Esaki ta e lista cu e creador di e festival, Gregory Elias ta bay acerca e aña aki na november pa firma, segun e mes a bisa NoticiaCla.com. Esey no kier men cu e ta logra, pero ta su lista di deseo. “Ta mescos cu un repi di chocola. Bo por tin un deseo pero esey no kier men cu bo ta haye” Elias a splica NoticiaCla.com.Tin algun di nan cu Elias ta purbando pa e ultimo 4 aña sin logra, pero e no ta ‘entrega’.

Pa loke ta e evento di otro aña, no por confirma si esaki ta sigui pasobra ta dicidi esaki despues di e festival di e aña aki. Mescos cu e añanan anterior, lo laga traha un rapport di e universidad di Merca, presidi pa profesor Tico Croes, y basa riba esey ta determina si ta factibel pa bolbe tene e festival e aña siguiente. Loke tin cu mira si ta mira un crecemento, entre otro. Loke cu Elias no ta participa den dje ta e asina yama ‘self complacency’, esta bira satisfecho cu bo mes y laga los. “E ta algo hopi mahos y ta algo cu sigur ami no ta!” Elias ta sigura. Un otro factor pa determina si e festival ta continua ta e elemento di bendemento di carchi, e entusiasmo di esnan cu ta bishita, manera Aruba, y e salud y e modo nan financiero. “Si tur e cosnan aki ta na ordo, mi no ta kere cu nos ta bai bisa cu no ta bin un di seis (festival) otro aña”.

Pa aworaki, nos ta den porta di e di 5 edicion di CNSJ 2014 cu ta ranca sali diahuebs proximo cu e homenahe di Doble R, sigui pa e festival mes cu tin artistanan manera Juan Luis Guerra, Mana y e grandi pa 2014 esta Bruno Mars.