CEO di InselAir Aruba a entrega su retiro

ORANJESTAD - E hefe corporativo di Insel Air Aruba Frederick Nuboer a tuma su retiro diabierna ultimo. Mientras cu pa mundo afo, esaki a bin como un sorpresa, InselAir mes ta sigura NoticiaCla.com cu esaki tabata conoci caba. "Ela anuncia esaki for di aña pasa. Y e a tuma tempo pa hunto cu nos yega na un  bon overdracht, responsabel.  Nos lo keda haci uzo di su capasidad y sabiduria durante e tempo venidero", NoticiaCla.com a haya confirma di su fuentenan cerca di e proceso. Den curso di siman, e portal aki lo tin mas informacion riba e tema aki. 

CAMBIONAN DEN INSELAIR

Manera ta conoci, InselAir international y InselAir Aruba ta den proceso di restructuracion y pa varios luna caba tin cambionan tumando lugar na e compania. Fuera di reduccion di cierto ruta y personal regular, tabatin cambio na top tambe. Entre nan gerente di mercadeo Tita Iglesias tambe a cambia aña pasa y asina tin mas. Mientrastanto e aeroliña ta continua cu su plan di restructuracion y ta spera di ta cla 'pronto' pa por recupera su posicion clave den mundo di aviacion.