Conseho di minister di Reino a aproba geschillenregeling

DEN HAAG - Conseho di minister di Reino a bay di acuerdo pa instala un 'geschillenregeling' porfin. Esey a keda dicidi diabierna mainta y publica mesora. Problema ta cu e contenido no ta conoci ainda publicamente, y tampoco pa parlamentarionan di e 4 paisnan den Reino. Den declaracionan na e vespertino Amigoe diabierna, fraccionan di parlamento di Aruba a mustra cu nan no ta na altura di e contenido, pero cu MEP a bisa cu e si sa e contenido y cu e no ta esun cu a bringa p'e. Rene Herde di AVP ta spera cu Plasterk tene cuenta cu e deseonan di e 4 islanan, ela declara na e vespertino. 

E ANUNCIO

E anuncio oficial a bin diabierna mainta (ora di Aruba) despues di e conseho di minister di Reino. Segun e 'relato', ora cu un desicion tuma pa conseho di minister di Reino wordo disputa, lo pidi un conseho di Raad van State di Reino. A base di e consehi ey, conseho di minister di Reino lo reevalua su desicion y ta tuma un desicion riba e conseho. Excepcion ta decisionnan cu presidente di conseho di minister di Reino considera di peso pa Reino y cu no por tin retraso ariba, desicionan riba cual a  base di leynan existencia, un asina yama 'kroonberoep' por wordo institui, y 'rijkswetten' riba cual Raad van State di Reino ya caba a emiti un conseho.  Aceptando e proposicion, e ta duna contenido na articulo 12a di Statuut pa yega na un areglo riba disputa entre islanan di Reino. Conseho di minister a bay di acuerdo pa manda e concepto di ley pa conseho pa Raad van State. Unabes cu e ley keda presenta na Tweede Kamer, e texto di e ley y e conseho di Raad van State ta bira conoci. 

REACCION ANDIN BIKKER

E unico lider di fraccion cu a reacciona pa NoticiaCla.com, Parlamentario Bikker, lider di fraccion PDR y alabes, miembro di plataforma Forsa Nobo a bisa cu ela compronde cu ta den Rijksministeraad a dicidi cu ta bay manda e concept cu Minister Plasterk a pone ter Internet consultatie aña pasa pa Raad van State duna conseho riba dje, pa despues mande Tweede Kamer. "Si e keda mescos cu e concept cu a wordo poni ter Internet consultatie lo mi propone amienda paso esey no ta voldoe na e afsprakenlijst di Ipko esta bindende uitspraak", Bikker a bisa NoticiaCla.com. Otro lidernan di fraccion no a reacciona ainda pa e portal aki.