Jeroen Pauw a hala atencion na UNESCO Media Pressure Cooker

ORANJESTAD - E prome UNESCO Media Pressure Cooker Marathon a inicia diahuebs mainta na Universidad di Aruba cu presencia di mas of menos 55 participante, y entre nan un grupo di periodista local. E intencion ta pa hunto formula y publica riba media na Aruba den tur su faceta. E intencion ta pa explora varios aspecto, y hunto publica un long read multimedial tocante e tema di periodismo na Aruba. Lectornan invita ta entre otro e popular periodista Hulandes Jeroen Pauw di e programa 'Pauw', y periodista di N.O.S. Dick Drayer. Hunto tin tambe periodista Favell Maduro di Corsou. Riba e prome dia, tur atencion tabata pa e presentacion di Pauw, mescos cu tabata e caso aña pasa durante un evento casi similar na Corsou.

PROGRAMA

E programa ta encera tres dia di session di trabou, transmision en vivo y training pa medio di e lectornan menciona. Despues di 4 siman di produccion, lo publica oficialmente e resultadonan di e evento aki riba dia 15 di februari pa henter pueblo di Aruba. E obhetivo di e proyecto aki ta pa educa y contribui na un producto cu lo amplia conocimiento di periodismo di Aruba, stimula colaboracion y eleva sabiduria di publico tocante media na Aruba. UNESCO ta patrocina e evento aki. 

PROME DIA

Entre actividadnan, tabatin e presentacion di Jeroen Pauw cu a splica y trece e punto dilanti di bon periodismo den un comunidad chikito manera Aruba. Kico ta e retonan diario cu un periodista ta encontra, y compara esaki cu paisnan grandi manera p.e. Hulanda. Aki tabata interesante con Pauw a hinca e problemanan di Aruba (manera describi pa periodistanan local), y a duna un bista con pa miho atende esaki posiblemente. Tambe a purba trata kico e impacto di periodismo na Aruba ta riba e sociedad. Pauw a contesta preocupacionnan di esnan presente y a ilustra un bista internacional di e contraste cu resto di mundo. Varios periodista local a drenta den un debate cu Pauw, cu a haci e atardi sumamente interesante. Diasabra Pauw ta bolbe, pa presenta tecnica con pa haci miho entrevista. Pauw ta un veterano riba e tereno di entrevista y lo comparti su experiencia y yuda esnan presente con pa mehora nan tecnica di haci entrevista. 

RESTO DI DIANAN

Riba e proximo dos dia lo tin varios session unda cu lectornan manera experto Dick Drayer di N.O.S. lo atende tres topico cu ta comun pa traha ariba den un escala chikito manera Aruba. Drayer ta representa N.O.S. na Corsou pues tin e experticio y conocemento di esaki ampliamente. Entre e topiconan lo trata 1. independencia editorial, 2. censura propio, 3. regulacion propio (uzo di codigo di edita y statuto editorial). E dia lo continua cu ehercicio practico sigui pa presentacion di e logronan. Y diasabra Pauw ta continua cu su entrenamiento riba tecnica di entrevista, sigui pa Favell Maduro cu ta presenta tecnica pa video. Anochi lo tin e presentacion final di tur loke a logra den e tres dia maratonico.