Buleria por toca den Tumba na Corsou, pero no den parada

WILLEMSTAD - E banda di Aruba Buleria por toca den festival di Tumba di Corsou, pero no por participa den ningun otro actividad durante temporada di carnaval na Corsou.  "(Mirando e hecho cu) temporada di Carnaval ta reserva pa nos musiconan local, Buleria no por toca durante temporada di carnaval na Corsou". Asina presidente di Asociacion di Musico y Artista di Korsou (AMAK), Feco Gomez a bisa den un comunicado diahuebs. Segun Gomez, manera directiva a anuncia durante conferencia di prensa, na november 2010, Amak di Corsou y AMAA di Aruba a cera un combenio, pa wak con por bay estrecha e lasonan cultural musical entre e dos paisnan.

AREGLO PA DECEMBER

Ya caba t'asina cu pa luna di december no tin restriccion, pero pa locual ta e temporada di carnaval, si e organisacionnan a cumbini, cu kisas den 2018 por yega na un palabracion nobo, pa locual ta trata intercambio entre e islanan.

EXCEPCION PA FESTIVAL

"Na e momentonan aki ta haci excepcion pa e festivalnan, y como tal Buleria pa prome biaha lo bin competi den nos festival, mientras tin algun musico di Corsou cu lo toca den festival di Calypso na Aruba" e comunicado ta sigui bisa.

ADVERTENCIA PA PROMOTORNAN

Pues pa e aña aki, 2017, ningun agrupacion musical di Aruba no por bin toca durante temporada di carnaval, y ningun grupo musical di Corsou por toca na Aruba. "Pues nos kier adverti tur promotor, cu artíkulo 47 ta papia palabra cla. Pues Buleria no por bin toca ni djump up ni den marcha di despedida. Amak lo vigila e asunto aki cu wowo di falki" Gomez ta finalisa bisando. Foto cortesia Buleria oficial.