Corte ta declara OM di husticia di clase den caso fraude voto

PHILIPSBURG – Corte na Sint Maarten a declara Ministerio Públiko (OM) no receptivo den persecucion di cinco sospechoso den e caso di fraude di vota di september 2010. Huez Koen Luijks ta bisa cu OM a duna impression di husticia di clase ora nan a persigui e bendedonan di voto si, y tambe un representante di Verenigde Volkspartij (UP), pero a keda sin investiga e papel cu e partido aki y su lider Theo Heyliger a hunga. Bou di e cinco sospechosonan tin un polis cu a fayece na juni. E otro cuater sospechosonan tabata den Corte durante e sentencia.

Huez Luijks den su consideracionnan ta bisa cu OM a haña tur tempo di mundo pa investiga e papel di Heyliger y UP y cu tabatin suficiente indicacion pa hustifica e investigacion aki. Segun informacion di Criminele Inlichtingen Eenheid (Unidad di Informacion Criminal, trad.) na 2010 Heyliger a hinca tres miyon dolar di su propio fondonan den e kaha di eleccion di UP.

“No a hasi niun esfuerso pa investiga e papel aki”, asina tin para den e veredikto. Corte ta bisa cu ta “incomprendibel” cu nunca Landsrecherche no a interoga Heyliger y ta bisa cu desisionnan di OM ta contra e principio di igualdad y e prohibicion di arbitrariedad.

Pa Corte ta sigur cu e sospechosonan ta culpabel di fraude di vota. “No receptividad ta ofrece un miho garantia riba exterminacion di fraude di vota den futuro. Ku esaki partidonan politico por ta sigur cu OM lo hiba un investigacion penal si tog cumpra voto”, segun e sentencia.

Autor: Hilbert Haar, Red Karibense.  foto: Lider di UP Theo Heyliger den kampaña – potrèt: UP