MEP: Claridad prome cu pensa pa hisa prijs di awa y coriente

ORANJESTAD – Prome cu kier pensa di aumenta tarifa di awa y coriente, mester tin claridad riba e companianan di utilidad y nan maneho. Parlamentario Xiomara Ruiz Maduro di partido MEP ta mustra cu no por djies tene un dialogo social unda cu kier dicidi cu ta bay aumenta tarifa di awa y coriente. Entre e claridad, Ruiz kier sa con e gastonan di trabounan di utilidad pa diferente proyecto a wordo paga. Entre nan Ruiz ta referi na e.o. e trabounan haci den Caya Betico Croes, Linear Park, Baby Beach, Solar Parking y ponemento di luz LED den proyecto Bo Bario. Ken a paga pa nan?” Ruiz ta puntra. E kier sa entre otro si e gastonan aki a wordo cubri pa inversion di FDA of pa e companianan di uitilidad.

Un otro claridad cu Ruiz kier sa ta, e asunto di dividendo di e dos companianan di utilidad. Segun Ruiz, varios biaha Ministernan Eman y De Meza a bisa cu nan gobierno no ta saca placa di dividend di compania di utilidad. “Pero ya caba nos a yega di e publica carta na unda cu e director di Elmar ta manda pidi NIB permiso di inversionista pa paga e 3 miyon di dividend di 2010 cu Utilities NV a manda pidi di Elmar” Segun Ruiz, e carta aki ta prueba con e Ministernan Eman y de Meza ta gaña.

Tabata siman pasa cu minister de Meza a declara na NoticiaCla.com cu enberdad e compania WEB ta ‘den rood’ pero cu e situacion no ta alarmante. E la mustra mesora tambe na e hecho cu lo tene un dialogo social e luna aki mes pa delibera eyden con por regla e situacion y saca e compania for di rood. No ta asina si segun e mandatario, cu ta bay aumenta tarifa unilateral. E mandatario no a bisa si, kico e metodonan ta cu lo kier aplica. TA conoci cu WEB pa varios tempo kier aumenta nan tarifa nan ya cu nan a absorba e perdida pa varios aña caba. Algo cu e mandatario di energia a confirma na NoticiaCla.com tambe.