Joselin Croes no ta abogado mas di compania cu a maneha Señor Frog's na Aruba

ORANJESTAD - Abogado Joselin Croes a informa NoticiaCla.com oficialmente cu e no ta abogado mas pa e compania cu a maneha Señor Frog's, esta Jobem NV. "Mi a tuma nota di e declaracionnan cu a sali den prensa relaciona cu e caso di Jobem N.V. y tambe mi a tuma nota di e criticanan personal contra mi persona" Croes a cuminsa na bisa. "Pa loke ta trata e caso di Jobem NV mi por bisa cu na december ami bou instruccion di mi cliente Jobem N.V.  a declara cu e salario di e empleadonan di december y januari lo wordo paga, paso esaki ta e informacion cu ami a haya di mi cliente cual nan a pidimi pa declara publicamente y na e empleadonan. E salario di december a wordo paga completo mas tur vakantiegeld na december, esaki por wordo colabora pa Abogado Coffie y e empleadonan, pero esun di januari no" e abogado a sigui bisa.

RETIRO COMO ABOGADO 

Desde siman pasa cu e abogado di e accionistanan di Jobem N.V. a informa Croes cu e salaris di januari di e empleadonan lo no wordo paga. Eynan Croes a informa nan cu elo no por representa Jobem N.V. mas. " Pa cual motibo mi no tin ningun informacion adicional riba kico si of no Jobem N.V. lo bai haci den futuro".

Pa loke ta trata e criticanan personal relaciona cu e topico aki, Croes a scoge di no haci politica cu su trabou. "Mi lo abstene mi mes di duna comentario riba tur e criticanan personal dirigi na mi persona relaciona cu e caso aki. Mi ta un abogado di profession cual lo trece cu ne cu algun bes mi lo defende e trahado, pero algún bes mi lo defende e dono di trabou" Croes a sigui bisa. "Manera mi a splica den mi rueda di prensa mi no ta un Minister, ni Parlamentario ni ambtenaar cu tin e luho di bay cu bijzondere vrijstelling van diensten pa campaña, ami mester traha tur dia y esaki ta mi trabou".