Cacho di polis entrena na Aruba a detecta arma caba na St Maarten

PHILLIPSBURG – Den apenas 3 dia di tempo, e cacho di polis Astorie a localisa no menos cu 3 arma di candela na St Maarten. Entre esnan localisa pa e cacho, tabatin un  Hip point .40 caliber y un 9mm Hi Point JCP Smith & Wesson C9 luger. Ambos a wordo localisa durante un buskeda den un auto di un sospechoso.  Loke ta haci esaki special ta cu e ta un cacho entrena completamente riba e disciplina di arma, na Aruba. For di su ‘graduacion’ luna pasa, Astorie hunto cu su manehador Reckets Moeslikan a bolbe St Maarten unda cu e la cuminsa traha mesora pa cuerpo policial di e isla. Ambos a sigui e entrenamento segun regla di Aruba. Actualmente e cuerpo di St Maarten tin 4 cacho di polis, dos cu ta surveillance, y dos riba rastreamento (speuren).

Desde un tempo caba, e departamento di husticia k-9 ta e unico den region di Caribe cu ta entrena su propio cachonan y ta provee hunto cune, e entrenamento pa e manehador nan. Nan ta haci esaki no solamente pa Aruba sino pa otro islanan den region tambe.