DIMAS: Aumento drastico den peticion pa extension di estadia turistico

Posted on 1/18/2017, 4:39 PM AST | Updated on 1/18/2017, 9:19 PM AST

ORANJESTAD - Den 2016 DIMAS a registra un bahada leve pa locual ta trata e peticionnan pa permiso regular y un aumento drastico den e cantidad di peticion pa extension di estadia turistico.

BAHADA LEVE DEN PETICION PA PERMISO DI ESTADIA

Den aña 2016 DIMAS a registra un total di 14626 peticion pa un permiso di estadia. Esaki ta poco menos compara cu aña anterior, unda a registra 15173 peticion pa un permiso di estadia. E reparticion di e cantidad di peticionnan pa un permiso di estadia cu ta relata na trabou compara esnan cu no ta relata na trabou, no a conoce mucho cambio, si compara e cifranan di 2015 cu esun di 2016.

PETICION DEN 2016

Pa locual ta trata e peticionnan den 2016 cu ta relata na trabou por deduci cu un total di 49,5% ta pa trabou cu pago regular, 21,7% ta pa empleado domestico, y e sobra ta reparti bou otro categorianan. DIMAS tin segun ley un termino di 12 siman di tempo pa procesa un peticion y por extende e termino aki cu 12 siman adicional. DIMAS a logra den 2016 di contesta 81% di e cantidad di peticionnan pa un permiso di estadia dentro di 12 siman. A aproba un total di 61% di e peticionnan pa permiso di estadia, a desaproba 20 % y e sobra falta ainda pa haya un contesta for di DIMAS.

AUMENTO DEN PORCENTAHE

Por nota den 2016 un aumento den e porcentahe di peticionnan nenga pa un permiso di estadia compara cu e añanan anterior. Esaki ta debi na algun factornan entre otro:  

cu ta constata cu e declaracionnan di conducta no ta na ordo of no por a verificanan,  ta constata cu e personanan pa cual ta pidi un promer permiso ya ta na Aruba caba mientras cu segun maneho nan mester warda contesta riba e promer permiso den exterior  ta uza documentonan falso (entre otro payslip) pa comproba un entrada anual cu ta ficticio, falsifica of no ta conforme locual a declara na instancianan gubernamental.DIMAS ta verifica y certifica informacion suministra, entre otro cu Departamento di Impuesto y cu SVb.

AUMENTO DRASTICO DEN EXTENSION DI ESTADIA TURISTICO

Pa locual ta trata e estadia cortico, DIMAS a registra 4617 peticion pa un extension di e estadia turistico den 2016. En comparacion cu aña 2015 por papia di un aumento considerabel. Di cual e nacionalidad cu a predomina den 2016 ta esun Venezolano y igual cu e añanan anterior por constata cu un gran mayoria di e peticionnan pa extension di e estadia turistico ta trata di e categoria di turista cu ta keda na cas y bou garantia di un famia.