Pago laat di automobilistanan a conduci na cambio di ley

ORANJESTAD - E cambio di ley cu a sosode casi na final di aña 2016 cu a pone cu awor e automobilista por paga su number di auto den dos paga 'so' compara cu cada cuartaal (4 biaha), tin su motibo. E cambio a causa basta critica den cierto gruponan, y vocero di departamento di impuesto, Meverly Romano a splica e motibo. "Incumplimento di belasting manera cu e mester ta. Nan tabata cumpli hopi laat, no paga na tempo y tabata paga ora aña bolter", Romano a cuminsa na bisa. "Nunca gobierno no ta haya e placa di motorrijtuigbelasting den e aña concerni". 

CAMBIO PA 2017

E aña aki pues e cambio ta cu e automobilista cu tin plachi A, mester paga e number den 2 paga, cu ta fin di januari 31 y 30 di juni. Esaki contrario na e prome fecha cu tabata 15 di februari. Pues e ta mucho mas prome cu esaki. Esnan cu tin plachi personalisa of motorciclistanan si mester a paga den un termino. Pa nan no tin cambio.