CAft a faya cu publicacion di carta y forma di opera

ORANJESTAD - Vice presidente di Parlamento Rene Herde no ta contento cu ni e contenido di e carta recien di College Aruba Financieel Toezicht (CAFT) ni cu e hecho cu ela keda publica (awor caba). Ademas e no ta considera e carta, como un rapport riba e presupuesto 2017, sino mas bien un carta pa 'pidi mas informacion pa nan (CAFT) por caba nan conseho'. Herde cu nunca tabata pro CAFT, ta mustra cu ta trahando cu nan no obstante, pasobra Hulanda a forsa Aruba pa ley. Ta bon pa tin un tipo di analisis asina, pero e no ta di acuerdo con CAFT ta haci'e.  

NUNCA TA HAYA ELOGIO

"Di CFT bo no ta bay haya elogio. Sea cu tin algo cu tin cu drecha, of nan ta inventa algo" Herde a sigui bisa. No ta un secreto cu Herde nunca no tabata contento cu CAft su trabou, pero ta sinti cu na 2014 Aruba a hay'e cu e situacion aki y cu tin cu cumpli. "Ta conoci cu mi tin problema cu e moda cu CFT ta traha", Herde a confirma na NoticiaCla.com. 

FAYO DI CAFT

Herde ta mustra cu den ley (di LAft) ta stipula ki ora por publica y con tin cu publica (algo). "E ta un palabracion. Cu nan a bolbe haci'e (malo), no ta prome biaha. Cu algo ta sali den publicidad cu no mester sali den publicidad ta nan fout. Y mi ta cuestiona esey ora cu mi topa cu nan" Herde a sigui bisa. "E no ta netjes. E ta kibra e confiansa cu bo mester tin cu nan" e parlamentario a bisa. Pero den e caso aki tambe ta bay pa e forma con CAft ta traha. 

TRAHA CU BISTA GENERAL

E problema cu Herde tin tambe, ta cu Caft no ta traha cu un bista general sino si netamente e cifranan ta cuadra manera cu nan ta desea. Ela uza Corsou como ehempel atrobe unda cu for di 2010 for di tempo cu CFT a cuminsa eynan, e isla no a conoce un crecemento economico. Esaki pasobra CFT a corta den nan presupuesto te corta di mas pa e cifranan cuadra. "Pero e resto di Corsou a keda pega!". Y segun Herde, nan ta culpa CFT riba esey. Algo cu Herde ta sigura cu no tabata kier pa sosode na Aruba. 

FALTA DI CIFRAS

E fayo mas grandi di CAft den e caso aki ta, segun Herde, cu nan a publica un carta sin tin tur cifras pa por traha un analisis corecto. "Nan no tin e informacion den e carta. Nan ta pidi informacion. Si bo mes ta bisa cu bo falta informaicon, con bo por yega na conclusion?". E hecho cu CAft ta bon keha cu nan no tin informacion ta tipico CAft y ora cu nan sinta cu gobierno, nan ta haya tur informacion. Herde no ta di acuerdo cu gobierno ta 'tene informacion atras' pa CAft. "Nan a haya tur informacion!" Herde a sigura NoticiaCla.com. "No ta cuestion cu nan no ta haya informacion. Pa ley nan mester haya e informacion". 

CON YEGA NA CONCLUSION COMIENSO DI AÑA

CAft a yega na conclusion di algo siendo cu ta apenas aña a cuminsa. Segun Herde, CAft no por haci esaki, pa bin cu un presupuesto siendo cu ta prome siman di aña bo ta bezig. Pero ya caba CAft ta bisa cu na final di aña bo no ta bay logra algo presupuesta. "Con bo ta yega na e conclusion ey!" Herde ta cuestiona. Segun Herde, gobierno pa ley ta cumpli cu tur palabracion haci. "Semper CAft ta haya tur informacion".