Wever: Peticion pa papia cu Marisol t'ey, pero no a haci'e ainda

ORANJESTAD - Contrario na informacionan cu ta circula, partido MEP no a papia cu Marisol Lopez Tromp (ainda). Lider di partido Evelyn Wever Croes a admiti si na NoticiaCla.com cu ela wordo pidi pa acerca e parlamentario independiente. "Hendenan a pidimi papia cu ne. Pero mi no ta den e fase ey ainda" Wever a sigura e portal aki. "Ami ta habri pa tur posibilidad manera m'a declara na NoticiaCla merdia anteriormente" e lider di e partido geel a sigui bisa. 

JOIN PARTIDO GEEL

Segun e lider di e partido geel, esnan cu por traha cu MEP of join MEP cu ta comparti e vision di e partido ta bon bini. Wever a ripiti e 'criteria' un biaha mas pa join e partido. Vision: 1) un gobierno integro di gobernantenan integro cu ta bisa loke nan ta haci y nan ta haci loke nan ta bisa. Pues e candidatonan tambe mester ta di integridad intachabel 2) un gobierno cu ta pone e ser humano central bek, despues di 7 aña di embeyecemento y inversion den proyectonan demasiado costoso. Bay bek na e ser humano 3) un gobierno cu ta bay desaroya nos economia pa crea cupo di empleo; crea pilarnan economico cu riba termino corto y cu urgencia ta crea trabou pa asina trece bienestar pa tur. "Si tin hende cu kier pone e vision aki prome, sigur mi ta papia cu nan. Pero asina leu mi no ta ainda" Wever a finalisa bisando.

FUTURO DI MARISOL

For di basta tempo e futuro politico di Marisol Lopez Tromp ta topico di discusion politico, mirando cu e 'paso' ey por tin efecto sigur riba e proximo eleccion. Siman pasa NoticiaCla.com a haya confirmacion di Otmar Oduber di partido POR cu el a papia enberdad cu Lopez Tromp na Corsou, y cu e (Marisol) ta hopi positivo pa cu e paso aki. Lopez mes tabata mas conservativo y politicamente mas 'corecto' admitiendo solamente cu ela 'bebe un capuccino' cu Oduber. Lopez a milita den tanto MEP como AVP y awor ta un parlamentario independiente. E ta mustra cu ainda e decision no ta tuma y cu ora cu ta asina leu, elo laga sa kico ta kico. NoticiaCla.com a base di informacionnan ricibi, a compronde cu tanto POR como MEP tabatin reunion pa purba logra hay'e den nan partido. Awe MEP ta admiti cu tin peticion pa papia e 'ex' colega di partido, pero nada no a sosode ainda. NOTA: Foto di archivo di NoticiaCla.com.