Cambio pa paga number auto ta un abuso pa taxi, autobus y tracker

ORANJESTAD - Otmar Oduber kier pa gobierno duna mas plaso pa taxi, autobus y tracker paga number di auto. Ela haci e suplica aki diamars mainta durante su conferencia di prensa di partido POR. E motibo ta e avalancha di keho cu ela ricibi di e grupo menciona. Nan ta considera un abuso lo cual ta tumando lugar caminda cu kier cobra e grupo aki nan number di auto den un solo paga. 

SCUCHA DOLOR

Segun Oduber, ela scucha e hendenan aki expresa nan dolor. Anteriormente nan por a parti e pago y realisa esaki na un forma mas husto y humano. “Paga 600 y pico, 900 y pico y hasta mil y pico florin cu nan mester paga den un solo pago ta un abuso y p'esey mi kier haci un yamada na e Gobierno aki pa por fabor reconsidera e decision aki di hendenan humilde, hendenan cu ta traha hopi duro, hendenan cu tin cu paga nan mesun AZV, nan mesun BBO y tin cu cubri nan gastonan”, Oduber a bisa den conferencia di prensa. 

TEMPO PA HACI CAMBIO

E ta di opinion cu dunando tempo por haci cambionan, pero mester duna un periodo di gracia pa e hendenan por prepara nan mes, por ehempel 1 aña pa nan por ta prepara y spaar e placa pa por paga nan number di auto den un solo biaha. Pero no na e forma ad hoc y inhumano cu mester paga 1200 florin den un solo biaha.