Biahe premier Eman pa Samoa no ta nifica fin di impasse

ORANJESTAD – E hecho cu prome minister Mike Eman ta representa Reino Hulandes na e conferencia "Small Island Development States" na e isla Upolu di Samoa e siman entrante (lesa programa di e evento aki) , no kier men cu e impasse entre Hulanda y Aruba ta pa pasado. E diferencia di opinion riba e asunto di presupuesto y e tension acerca ta sigui entre e dos gobiernonan aki, pues esey no a cambia, segun NoticiaCla.com a compronde . Ta solamente cu ta separando dos asunto for di otro. Un asunto netamente ‘local’ y uno cu un aspecto mas internacional. Ademas, e problema cu tin entre e gobiernonan di Hulanda y Aruba ta netamente riba ‘finanzas di gobierno’ y no e topico pa cual e ta biahando.

Pa loke ta e biahe mes, premier Mike Eman ta lidera e delegacion di Reino Hulandes pa e di tres conferencia riba e tema di desaroyo di islanan cu ta tuma riba e isla di Aipa na Samoa otro siman. E meta di Eman na e conferencia, ta netamente pa presenta e vision di Reino Hulandes (cu de facto ta un tema cu Eman y su gobierno a inverti hopi aden), E conferencia mes ta tuma lugar entre 1 pa 4 di september, pero prome cu esey tin actividadnan cu ta presidi e evento cu ta di 28 pa 30 di augustus, tambe na Apia, capital di e isla Upolu na Samoa. NoticiaCla.com a compronde cu e mandatario ta biaha diamars pa hulanda y ta sigui dia 30 pa Samoa unda cu e lo keda pa duracion di e conferencia. Minister presidente ta biaha diamars pa Hulanda, durante cual e lo topa cu varios miembro di gobierno hulandes aunke no a bisa ken, y tambe gruponan di sector priva. For di eynan ta continua despues di algun dia pa Samoa.