Bikker: Si Alonso kere cu e tin rason, e tin cu bay corte

DEN HAAG/ORANJESTAD - E reunion cu Alonso Tromp kier tene cu un grupo di persona, ta ilegal. Asina lider di e partido Democracia Real Andin Bikker a bisa NoticiaCla.com for di Hulanda. Na Hulanda pa un bishita di trabou, Bikker a reacciona riba varios punto cu Tromp a trece den medio den e dianan nos dilanti. Segun Bikker, tin un diferencia hudiricamente cu por wordo resolvi dilanti mesa berde. Mes momento a pidi e grupo di persona cu lo a bay para banda di Tromp, pa recapacita y no cay den trampa di Tromp. 

BAY CORTE

Segun Bikker, e problema cu tin entre su persona y Tromp ta uno huridico, unda cu cada uno ta interpreta documentonan di un tal forma. "Si e (Tromp) ta kere cu e tin rason, e tin cu bay corte y busca su derecho, caminda pafo ta e solucion" Bikker a bisa. Pero tene reunion, cu Bikker ta considera ilegal, cu un grupo di persona cu a cay den trampa di Tromp, no ta resolve e situacion. 

CAMARA DI COMERCIO

Bikker a sigura e portal aki cu a notifica Camara di Comercio tambe caba pa medio di carta di abogado, cu tin un disputa huridico den e partido riba e asunto y como tal no por acepta ningun cambio riba e statutonan y otro asuntonan na Camara di Comercio cu ta regarda e partido. Esaki ela haci pa evita cu por tin sorpresa despues. Unabes cu Camara di Comercio tuma nota di e carta, e no mester actua riba peticion di Tromp segun Bikker. 

BESTUUR

Tromp no ta miembro di bestuur segun Bikker a splica e portal aki, y siendo un candidato di partido no ta automaticamente converti bo den un miembro di partido. Bikker a sigura tambe cu e tabatin contacto cu miembronan di bestuur y cu nan ta para su tras. A mustra tambe cu Tromp lo tin un 'caracter dificil, sumamente fastioso'. "E ta un persona cu ta pensa riba su mes" Bikker a bisa. Ademas Bikker ta sigura cu Tromp lo tin un lista di hende cu lo ta su tras, pero cu mientrastanto a 'hala atras'. E ta lamenta e intencion di Tromp, cu supuestamente ta pa kibra e partido. "Mi ta haci un apelacion na esnan cu a cay den su trampa, recapacita. Tin cu wak kico Tromp kier logra (cu su ultimo accionan)" Bikker a finalisa bisando. NoticiaCla.com a tuma contacto cu Tromp pa reaccion, pero despues cu inicialmente ela mustra interes pa reacciona dialuna, diamars no a duna oido na yamada na su direccion ainda.