Cas di Cultura a bati alarma pa estado deplorabel di edificio

ORANJESTAD - Dialuna mainta Cas di Cultura a enfrenta un ‘shock’ ora a drenta auditorio di Cas di Cultura y a wak cu un parti di kolom banda p’ariba a kibra y cay abou den sala. E ta un siñal cla pa Stichting Schouwburg Aruba (SSA) cu e edificio no ta den e estado pa por lapi mas. Hasta un parti di beton na entrada cu a wordo drecha na 2015 a cay di nobo. Tres contratista a wordo yama y tur a bisa cu nan no kier conseha lapimento of drechamento cosmetico mas, pero kier pa SSA pidi conseho cu expertonan di construccion.

SSA ta trahando duro tras di cortina pa keda cla cu e schetsontwerp nobo pa e edificio renoba y restaura. Esaki no ta kita cu tempo no ta para. Tempo ta un destructor fuerte di edificio, vooral ora pa decadanan no por a wordo haci  mantencionnan estricto riba structuranan fundamental. Esaki ta un ‘wake up call’ no solamente pa e fundacion, pero pa pueblo tambe. SSA ta sinti cu lo ta un berguenza enorme si Aruba no por tin su Teatro Nacional y Centro Cultural pa por brinda e plataforma cultural y artistico indispensabel cu cada pueblo mester. Na 1957 Hulanda, Eiland Gebied y Refineria Lago a mira e importancia pa financia e construccion di un teatro y centro cultural pa e bida cultural na Aruba. Nos mester ta hopi orguyoso cu a logra di ta habri pa tanto tempo sirbiendo comunidad.

Maske cu SSA ta gradicido pa e subsidio cu ta ricibi di gobierno, e fondonan, incluyendo propio ingreso, no ta suficiente pa mantencion, personal y programacion. SSA no ta sintando keto tampoco y ta realisa cu mester bira hopi mas empresarial. Cu e fin aki Unoca y Ecorys Fund di Hulanda y Europa a subsidia un curso importante pa Cas di Cultura y su stakeholdernan primordial. Esta e curso y coaching di 8 dia yama ‘Wijzerwerven; Financieringsmix Cas di Cultura Aruba’ cu lo duna bista riba diferente metodo di haya ingreso di un manera cu bo organisacion ta bira sostenibel. SSA no kier alarma comunidad ni su clientenan, pero ta tempo di ta hopi consciente cu e edifio ta den mal estado. Nos lo keda opera normal te ora cu ta cla kico nos mester haci pa drecha e situacion.