Ex edificio di havenkantoor awor pa infrastructura

ORANJESTAD – Despues di a fungi pa hopi anja como oficina di ministerio di turismo, sigui pa oficina di ex minister di turismo, bureo innovatie y tambe pa algun raadsadviseurs,  e edficio dilanti Renaissance Hotel, lo bay fungi awo como oficina pa ministerio di Infrastructura. E edificio originalmente tabata havenmeesterkantoor.  E la pasa un proceso di restauracion cu a costa 750 mil florin y ta trata un edificio cu originalmente a keda traha na 1938. Diamars mainta minister responsabel pa oficina di monumento Otmar Oduber ta haci entrega oficial di yabi na Minister di Infrastructura Benny Sevinger. E edificio (situa na skina di Schuttestraat y L.G. Smith Boulevard) ta bay wordo ocupa pa funcionarionan di InfraTeam como tambe DTI y Serlimar.

Segun hustificacion pa e cambio di uso di ministerio, gobierno ta mustra cu e ubicasion ta uno masha logico y practico pa e departamentonan aki cu ta traha constantemente riba diferente proyectonan den centro y rond di Playa. Ta brinda un punto for di cual por cana bay pa supervisa e trabounan cu ta wordo haci. Un di nan cu ta masha importante ta hustamente e siguiente fase di Linear Park cu ta pasa dilanti di e edificio historico aki.