No preocupa cu registro abou di negoshi na KVK

ORANJESTAD - Registro abou di negoshi na Camara di Comercio no ta un indicador cu actividadnan economico na Aruba ta malo. Asina minister di Economia Richard Arends a sigura NoticiaCla.com. Segun e mandatario, berdad e cifra di registro a baha aña pasa, pero esey ta un trend di crecemento autonomo cu ta corela cu e crecemento economico. "E cifranan di Camara di Comercio ta compara 2016 cu 2015, y 2015 cu 2014. 

CRECEMENTO 

"Dus entre 2014 y '15 bo tabatin un crecemento halto. Entre '15 y '16 e crecemento ta menos halto. Y esey ta (basicamente) e conclusion cu ami a saca anto di e declaracionan di Camara di Comercio" Arends a bisa, admitiendo cu tin menos compania cu a inscribi nan mes pa por forma parti di economia di Aruba. Pero esey no kiermen cu cos ta malo.

TIPO DI COMPANIANAN

E mandatario ta mustra cu ta depende di e tipo di companianan cu lo no ta registrando. "Mi lo ta preocupa ora cu companianan cu tin impacto economico grandi of suma ta bay failliet, of e registro a baha dor di cu e companianan a cera. Esey lo ta mas preocupante" Arends a bisa. Ela mustra tambe cu KvK ta ocupa cu 'opschoning' di nan database pa e refleha un bista mas actual di companiananan cu enberdad ta activo. 

PREOCUPACION DI KVK

Tabata un siman atras cu KvK a relata nan preocupacion pa e caida den registro. Segun e gremio, nan a culmina un 2016 cu no a bay facil pa hopi empresario local cu a pasa den basta turbulencia pa por mantene nan negoshi. Den diferente publicacion di Camara di Comercio (KvK) nos a indica caba e forsa limita di e consumidor local y caida den e consumo di turismo. E factornan aki ta hunga un rol importante den e cantidad di negoshinan cu a ser registra, keda y otro cu a sali di e registro di negoshi durante 2016.