Hooyboer: Opcion na Ingles nivel secundario pa hobennan cu 'GED program'

ORANJESTAD -  Minister Michelle Hooyboer-Winklaar a anuncia un programa nobo pa tur esnan cu falta nan diploma riba nivel di enseñansa secundario. Desde un par di aña caba Departamento di Enseñansa bou di auspicio di Ministerio di Enseñansa hunto cu Minister di Enseñansa a bin ta trahando riba cera un buraco existente den nos sistema di educacion.

Departamento di Enseñansa tin diferente formanan cu ta atendiendo cu e problema aki. Formanan manera Avond-MAVO y Avond-HAVO. Pero asina mes te ainda e buraco ta keda existi.

“Awe nos ta introduci GED, General Education Development. E ta un programa cu ta duna un diploma ekivalente na un “highschool diploma.” Esaki ta nifica cu ora un studiante completa esaki, na final di dia apesar di cualkier trayectoria anterior pues kisas e no tin diploma di MAVO, EPB of di HAVO, e por drenta un estudio superior.

Tin algun rekisito pa por drenta e programa aki pero ora caba e estudio aki e studiante lo tin un “highschool equivalancy credential.” “E diploma aki ta wordo mira igual na cualkier instituto cu ta reconoce esaki como un diploma cu por uza pa drenta un estudio superior. Pues studiantenan cu actualmente kisas no a logra caba un scol toch por drenta na nivel di college na Merca, Canada of otro paisnan cu ta reconoce esaki.  

E GED ta wordo ofreci door di International School of Aruba… “y ta bay ta completamente subsidia pa gobierno cu excepcion di e examen cu studiantenan mes mester por paga na un costo di US$140. E rekesitonan cu tin mester ta paspoort Hulandes, bo mester ta inscribi na Censo Aruba pa por lo menos cinco aña y bo mester ta 17 aña bay ariba,” e ta agrega. No mester tin diploma anterior, simpelmente mester por sigui e curso na Ingles riba cierto nivel, pasobra e programa ta na Ingles.

GED ta un estudio flexibel den e sentido cu e ta bay ta anochi cu ta nifica cu esnan interesa cu ta traha den dia lo por sigui esaki. Mas aleu, e duracion ta a base di bo rapides. “Asina ta si bo tin ya caba bon conocemento di algun di e temanan presenta den e programa lo bo por cab'e dentro di seis luna, por ehempel. Esnan cu tin mester di un tiki mas preparacion lo por tuma un aña of mas depende riba nan preparacion anterior,” Minister Hooyboer-Winklaar ta amplia.