Alegacion di CAFT riba risico di CITGO Aruba ta infunda

ORANJESTAD - E alegacion di College Aruba Financieel Toezicht cu e deal cu Aruba tin cu Citgo lo ta riscante, no ta valido. Asina minister di energia Mike de Meza a sigura NoticiaCla.com dialuna mainta. Segun e mandatario, tin hopi discusion tumando lugar cu si fiansanan cu tin cu PDVSA y  Citgo ta activo den dje, por tin impacto pa e deal di Aruba. "Aruba su refineria ta di Aruba. Aruba na ningun momento a pone como borg e refineria di Aruba" de Meza a sigui bisa. Nan (Citgo) no por pone e refineria borg sin autorisacion di Aruba. "Esey ta hinca tambe den e contracto" e mandatario a sigui bisa. "Si algo mester pasa mes, cu mi no ta premira, na ningun momento e complexidad e refineria lo ta na peliger" de Meza a sigui bisa. 

INTERPRETACION DI CAFT

CAFT, manera NoticiaCla.com a raporta den siman cu a pasa, a presenta  un analisis riba e risico cu e refineria CITGO por tin. Aki e colegio di supervision financiero ta presenta 3 risico. No por bisa cuanto e risico lo ta ora cu e refineria lanta bek, mas ainda e continuidad di e refineria relaciona cu problema di financiamento. "Mirando cu e compania madre PDVSA a haya su mes obliga pa hipoteca su interes den CITGO pa e operacion financiero, no por imagina esaki." De Meza riba esaki ta desmenti tur alegacion y ta yam'e 'infunda'.