Empleadonan Senor Frog's ta confirma cu nan temor a bira realidad

ORANJESTAD - Empleadonan Senor Frog's ta confirma cu nan temor a bira realidad. Diadomingo pa medio di un comunicado, nan a 'kibra nan silencio' riba un caso cu a cuminsa aña pasa november. Manera cu e comunicado ta relata, tawata november aña pasa ora cu e trahadornan di Senor Frogs a uni, organisa y tuma paso pa asina proteha nan derechonan. Derechonan cu segun nan, a teme cu lo wordo trapa ariba dje pa parti di Senor Frogs y Grupo/Operadora Anderson di Mexico. "Despues cu e famoso Daniel Orosco a wordo nenga salida di Aruba, abogado Joselin Croes a presenta na nomber di Orosco y Grupo/Operadora Anderson" e comunicado ta sigui bisa. "A wordo haci yen di promesa y den official statements di su banda y entre otro cu e director/doñonan di Senor Frogs lo bin Aruba pa duna cara y regla cu e trahadornan. Na e momento ey tambe wordo bisa cu e trahadornan lo sigui haña pago en todo caso te ora cu e compania wordo declara failliet". Un suma chikito di placa a wordo manda pa paga e trahadornan te cu loke nan tawata debe nan prome cu nan a “cera” e quincenna pa november. Segun e trahadonan, a haci differente follow-up den december y awor na januari abogado Joseline Croes a informa cu su cliente lo no pone placa disponibel mas pa paga e trahadornan. E director/doñonan tampoco a bin duna cara. Recientemente segun un declaracion den medionan, departamento di impuesto a bende e inboedel di Senor Frogs na findishi. "Awor 32 persona a keda sin entrada y desapunta cu no a cumpli cu palabra cu a duna nan. Palabra cu a wordo duna y garantisa door di abogado Croes. Ta lamenta cu awor ta mustra cu e garantia cu a wordo duna tawata uno bashi" e comunicado ta sigui bisa. 

STARR RAMOS

Starr Ramos – antes Marketing & Public Relations Manager di Senor Frog’s Aruba y representante pa e empleadonan, a bisa: "E ultimo palabranan di Joseline Croes, no a surprise nos. E tawata nos temor. Mi ta representa 32 empleadonan di un compania cu a laga nos – como hende local – cu man bashi, hende cu ta pasando duro y cu a keda sin confiansa. Joseline Croes a acepta Grupo Andersons Corporate como cliente – sabiendo cu e ta bay representa y defende contra tur locual Croes mes a bisa  kier cambia den su campagne pa su political career y awo ta mustra cu e tawata solamente empty promises to keep the media at ease.” Starr a bisa. “ Ta con anos como loyal employees por keda asina”. Ramos a splica cu e no kier laga e topico aki sali full 'political related' – pasobra esey no ta su trabou. Su trabou ta bringa pa e derecho di su mes y su coleganan – pa nan haña nan derecho – pa nan haña nan pago – te cu e bancarota ta final. Pa nan haña locual Joseline Croes a promise y garantisa den tur su official statements y interviews. “Nos a perde nos pensioen, nos placa di vakantie, nos daily routine y - bo por bisa - un family bond, nos no a haña niun pago pa tur e añanan di servicio. Ta facil pa bisa – awo bay buska otro trabou – pero kico ta bay pasa na Aruba – si esaki ta wordo accepta? Con hende por traha cu confiansa pa nan hefe y compania si nan por wordo trata asina? Dicon nan ta permiti esaki na Aruba? Con nan por laga Daniel Orozco sali, como nos unico leverage – pa awo laga pasa locual nos a bisa di e prome dia caba y cu ta pasando awo exactamente?” Ramos a finalisa bisando. Aunke e por ta un caminda largo, caro y dificil p'e empleadonan, nan lo haci maximo esfuerso hunto cu abogado Dello Gomez y Brian Coffee pa e compania y Joseline Croes cumpli cu nan obligacionan. NOTA: Foto archivo NoticiaCla.com dia trahadonan di sr Frogs a bay protesta dilanti gobierno na november di aña pasa.