Gobierno tin atencion pa e problema di muchanan indocumenta

ORANJESTAD - E ultimo simannan aki tin hopi atencion pa e tema  di muchanan stranhero indocumenta. NoticiaCla.com a compronde cu ta trata di muchanan cu a nace of a ser treci na Aruba pa nan mayor(nan), cu ta bay scol aki na Aruba y a integra den nos sociedad, pero di cual nan mayor(nan) no a percura pa regla (continuamente) nan estadia legal. No conforme locual e ley di admision y e maneho pa admision di reunificacion familiar ta stipula.

Hopi biaha ta ora cu e muchanan aki ta cabando scol secundario of cu nan ta pensa den sigui un estudio avansa den exterior, cu nan ta realisa cu nan no ta mas den posesion di un permiso vigente. Y esaki ta trece cu ne situacionnan fastioso.

E tema aki tin basta tempo ta andando den nos sociedad y e tin atencion di gobierno. NoticiaCla.com mientrastanto a compronde cu ministerio di Integracion bou di guia di Minister Sevinger conhuntamente cu DIMAS y demas partnernan den e cadena di stranheria, ta trahando conhuntamente cu otro pa por yega na un maneho apropia pa e grupo specifico aki.

Mester remarca cu den pasado ya caba diferente maneho  a wordo implementa cu a brinda mayornan cu tin yuinan cu nan status no tabata regla e oportunidad pa coregi esey. For di nos cifranan di e tempo ey por ripara cu no a hasi uzo optimalmente di e oportunidadnan ey.

Segun informacion cu e portal aki tin, gobierno a subraya cu e ta un responsabilidad di cada mayor pa semper percura pa e status legal di nan yuinan menor ta na ordo continuamente desde nan ingreso of nacimento na Aruba pa no crea buraco den nan estadia legal na Aruba.