Minister Plenipotenciario: Pago studiantenan na Hulanda tin fecha fiho

ORANJESTAD – Studiantenan na Hulanda dialuna lo mester a haya nan pago cu tabata pendiente. Esaki a keda confirma pa Minister plenipotenciario di Aruba na Hulanda Alfonso Boekhoudt na NoticiaCla.com dialuna merdia. Esaki ta como reaccion riba e alumno (nan) na Hulanda cu tabata pidiendo auxilio di autoridad na Aruba pa nan asuntonan financiero keda regla miho. Segun e minister, pago na studiante ta tuma lugar semper mas tarda riba 25 di luna. Y si e luna ta cay den weekend, esaki ta sosode prome. “Den e caso ey, e la sosode despues” Boekhoudt a splica NoticiaCla.com. Cu esey tambe e problema di pago na studiantenan ta keda resolve, pues segun Boekhoudt, no tin issue mas.

Mas probable, ta un falta di comunicacion entre studiantenan y e varios departamentonan concerni, lo a pone cu e studiantenan no tabata informa di e informacion di fecha di pago manera a informa ariba. Esey a pone cu un grupo di studiante a rabia pasobra nan no por paga nan asuntonan escolar manera mester ta.

E informacion inicial ricibi for di Hulanda ta cu un grupo di studiante tabata disgusta pasobra te cu e fin di siman aki ainda, nan lo no a haya nan Aruba studielening of a haya solamente parti di esaki. “ Nos ta sinti cu nos ta wordu gaña akinan na Hulanda. Paso, Aruba Huis ta bisa nos cu Aruba no a duna akkoord pa hasi pago of pa paga tur cos na e studiante” un di e studiantenan, M.H. a laga sa for di Hulanda, via su tanta. E alumno a sigui mustra cu scol a cuminsa, y nan tur tin cu paga schoolgeld, cumpra bukinan, etc. Nan ta mustra cu tin hasta algun beursalen nobo di e aña aki cu ainda no a haña nan lening mes. “ Ya for di 5 di augustus nos mester a wordu paga y nada ainda” e studiante ta sigui bisa. Pero segun Boekhoudt esaki no ta cuadra pasobra manera indica caba, ta dia 25 di luna ta paga esakinan.

E grupo afecta ta studiantenan cu a bai studia na Groningen, Amsterdam y Rotterdam. “ Porta tin otro studiantenan den otro stad cu ami no conoce cu tambe lo ta pasando den un situacion similar” e studiante en cuestion a bisa. “ Ami ta papia pa nos grupo cu ainda no a haña nada of un parti so. Ami mes a logra haña mas on menos un tercera parti di loke me mester haña” e studiante ta sigui bisa. “Ora nos a puntra Aruba Huis dicon no ta haña full e lening y dicon e otro studiantenan no a haña di nan, nan ta contesta mi cu ta paso Aruba no a manadanan e lista completo pa paga”. Ora cu e studiantenan a comunica cu contact Aruba, nan a haya contesta u nan a manda e lista completo pa Aruba Huis. Esaki lo nifica cu Aruba Huis lo no mester tin un motibo pa keda sin hasi e pagonan. “ E trocemento di e berdad aki tin nos grupo tur disgusta aki na Hulanda. Nos kier un solucion y pa tanto representantenan na Aruba como Aruba Huis stop di tuma nos hasi y troce e storia den otro sin duna un contesta concreto”. Esaki ta e kehonan cu a bin for di Hulanda cu a wordo comparti cu medionan di comunicacion via un tanta di un di e studiantenan preocupa.