Chill Beer ta presenta Aruba su version di Fuik Dag, esta Aruba Boat Fest

ORANJESTAD - Aruba tin su propio evento compara cu Fuik Dag na Corsou. Chill Beer ta presenta e ekivalente di Fuik Dag na Aruba diadomingo awor cu yama Aruba Boat Fest. Tur hende prepara yate, boto of canoa, pasobra cerbes Chill ta cla pa trece e ambiente fenomenal di Aruba Boat Fest. Diadomingo awor, dia 15 di januari, santo blanco lo bula y olanan lo lanta pa e evento di aña 2017. Sea for di tera of for di lama percura pa bo ta na Surfside Marina unda musica lo resona y Chill Beer lo domina.

Cuminsando 12’or di merdia musica lo cuminsa cu presentacion di Honey Pot y JEON hunto cu GoGo, NutzBeatz, Sky, Top Rankin y Yeimy. E trip lo sigui te cu 7’or di anochi. 

Si ta landa bo mester landa… si ta peddle bo ta peddle… si ta cana bo ta cana pa yega… percura pa bo t'ey pa bo no perde e tremendo ambiente di Aruba Boat Fest! Djis bin y Chill.