CBA: Bishita di turista Venezolano a baha drasticamente

ORANJESTAD - Definitivamente e situacion di Venezolano na Aruba a baha drasticamente aña pasa. Cifranan di october 2016 cu Banco Central a emiti e siman aki ta mustra esaki tambe. Na october 2016, e cantidad di turista a registra 76.491 bishitante, cual tabata 29,8 porciento (-32.533 bishitante) menos cu na october 2015. E caida aki a resulta principalmente door di bahadanan den e mercado di Latino Americano di 64,7 porciento (-30.862 bishitante) y e mercado Norte Americano di 3,2 porciento (-1.598 bishitante). Di otro banda, e mercado Europeo a registra un subida di 14,3 porciento (+1.037 bishitante). E caida den e mercado Latino Americano a wordo primordialmente causa pa menos den bishitante for di Venezuela (-30.975 bishitante of -76.7 porciento). E bahada den e mercado Norte Americano a resulta pa gran parti for di un reduccion di 3,6 porciento den bishitante for di Merca (-1.701 bishitante). E aumento den e mercado Europeo ta debi pa un gran parti na un crecemento di 52,3 porciento den bishitante for di Gran Britania (+753 bishitante). E cantidad di turista crucero a baha cu 24,7 porciento (-12.604 bishitante) te na 38.349 na october 2016, compara cu october 2015. E cantidad di barconan a registra un bahada, for di 20 na october 2015 pa 17 na october 2016.