Señora cu a bebe posibel juice venena y bira malo, a fayece

ORANJESTAD - Un di e dos personanan posiblemente venena aña pasa november despues di a bebe juice, a fayece. Vocero di ministerio publico Ann Angela a confirma esaki diabierna merdia pa NoticiaCla.com. Ela confirma tambe cu e curpa di e señora di edad (esun cu a muri), a wordo tuma den beslag 'pasobra e ta trata di un morto no natural'. 

E CASO

Tabata dia 23 di november aña pasa (2016) cu dos miembro di un famia a bira malo despues di a babe juice den cual probablemente tabatin veneno. E señora di edad tabata hopi grave y a wordo transporta pa Colombia pa tratamento. Mientrastanto ela bolbe Aruba. Pero ayera den dia e noticia a drenta lamentablemente cu ela fayece. NoticiaCla.com ta manda palabra di condolencia pa famia di e fayecido y cu e defunto sosega na paz.