InselAir International ta presenta business plan 'nobo' otro luna

WILLEMSTAD - E management team di Insel Air international lo presenta e asina yama ' Stabilizatie en Businessplan' mas liher posibel pa e por wordo aproba den e hunta di comisario. Asina e compania a informa su trahadonan pa medio di un memo interno cu NoticiaCla.com a pone su man ariba. "E (plan) lo sirbi como base pa por cuminsa pago di e diferente 'tranches' door di gobierno. Ta premira cu e business plan lo ta cla mitar di februari" e memo ta sigui bisa. Tur esaki a bin despues cu NoticiaCla.com a publica e dos articulonan e siman aki riba e tema aki. 

COMBERSACIONAN ANDANDO

Combersacionan andando a base di e.o. e claim cu Venezuela y e socionan strategico potencial ta sigui door di e CEO actual of e director internacional. "Pa duna un bon contenido na su tarea pa cu e interes publico, esaki lo sosode pa medio di e director apunta pa gobierno, cu ta fungi como presidente di e management team" e memo ta sigui bisa. Manera cu e portal aki a informa caba e siman aki, tin informacion cu ta trata aki di e Canades Gilles Filiatreault, actual CEO di e aeroliña Air Madagascar.

META FINAL DI INSEL AIR

|nselAir International ta sigui bisa cu nan ta convenci cu 'den cooperacion cu gobierno, e meta final, ta pa logra y garantisa coneccion aereo crucial y un compania aereo solido'. Fuera di e informacion aki, a splica henter e proceso (ya conoci) cu e compania a pasa aden for di momento cu na september aña pasa nan a acerca gobierno di Corsou pa ayudo.