Citgo lo no logra entradanan presupuesta pa 2017

ORANJESTAD - Citgo lo no logra entradanan presupuesta pa 2017. Por lo menos esaki ta e pensamento di e colegio di supervision financiero di Aruba CAft den su rapport riba presupuesto 2017 di pais Aruba. Basa riba e analisis di impacto di gobierno relaciona cu e reapertura di e refineria, gobierno ta papia di 600 cupo di trabou directo y 650 cupo indirecto. Total gobierno ta mustra cu entrante januari 1,250 lo haya trabou. Sinembargo CAft ta duda cu tur e trahadonan aki enberdad lo tin un trabou den e luna aki (di januari). Tur cu salario average di AWG 50.680. Esaki ta nifica pues cu e colegio no ta confia y kere den e analisis cu gobierno a duna y ta mustra cu esaki no ta realistico. 

MENOS ENTRADA

Consecuentemente, e entrada di belasting y prima basa riba e trabou adicional calcula na AWG 20 miyon pa 2017, lo ta mucho menos. E entradanan aki ta consisti di e miyon na loonbelasting, 10 miyon di prima di AOV/AWW y 15 miyon di parti di AZV.  Tur esaki ta trece risico adicional pa cu e realisacion di e presupuesto entrega. 

ANALISIS DI RISICO

Banda di e analisis riba impacto di e refineria riba Aruba, a presenta tambe un analisis riba e risico cu e refineria por tin. Aki e colegio di supervision financiero ta presenta 3 risico. No por bisa cuanto e risico lo ta ora cu e refineria lanta bek, mas ainda e continuidad di e refineria relaciona cu problema di financiamento. "Mirando cu e compania madre PDVSA a haya su mes obliga pa hipoteca su interes den CITGO pa e operacion financiero, no por imagina esaki."

PERDIDA DI INGRESO

"Perdida di e ingreso financiero registra di e reapertura di e refineria por tin consecuencia serio pa e presupuesto di Aruba" CAft ta sigui bisa. E hecho cu gobierno di Aruba ta para garantia pa Citgo tambe ta forma otro risico. Pais Aruba ta para garantia pa RDA (Refineria di Aruba) si esaki no cumpli cu su responsabilidad. Segun e analisis, esaki no ta bira un caso. Sinembargo segun Caft, si e risico aki materialisa, e consecuencia financiero pa Aruba ta cuantioso.

OBLIGACION DI GARANTIA 

CAft ta recorda cu e obligacion di garantia di Aruba ta minimal 300 miyon dollar y maximal igual na e suma di inversion di Citgo den e refineria. E gastonan aki Citgo lo participa anualmente. Como tal e colegio kier un miho bista di e embergadura di e obligacionan y tarea di RDA y un discripcion pa cada obligacion di con ta mitiga e risico riba un eventual no cumplimento (di e obligacionan). "Riba termino corto ta parce cu e risico mas grandi ta cu e entradanan presupuesta pa 2017 lo no wordo logra y cu e lo trece e saldo financiero presupuesta den peliger" e colegio ta finalisa bisando. Lesa e analisis completo aki.