Palm Beach riba lista di 7 beach pa turista 'evita' si kier trankilidad

ORANJESTAD - Aruba su beach mas popular ta wordo castiga awor pa ta popular. Por interpreta esaki den varios forma. E portal hotelero conoci pa ta manda inspectornan special pa investiga, saca potret y rate cada hotel, Oyster.com  ta pone Palm Beach riba e lista di 7 beach Caribense cu bo no mester bay si bo kier tin trankilidad durante bo vacacion. Di e 7 beachnan riba e lista, Aruba ta figura como e number uno. Esey kiermen cu e ta popular y bon bishita, cu ta un bon cos. Pero di otro banda ta mira esey como un desventaha pa e turista cu kier trankilidad. 

CARIBE TA POPULAR

Segun e portal, Caribe ta un di e destinacionan top na mundo, marca pa su beachnan blanco etc. Pero esey ta atrae miles di turista, cu por haci esaki hopi ocupa y nada atractivo pa e turista cu kier trankilidad y scucha 'e zonido di lama'.

ARUBA MUCHO POPULAR

E portal ta informa cu Aruba ta ricibi approximadamente 1.5 miyon bishitante y cu e number aki ta sigui aumenta. "Ta suficiente pa bisa cu e number ey ta un lugar popular den Caribe. Ta relata tambe cu ora cu turista bin Aruba, nan ta keda riba sea Palm Beach of Eagle Beach. Y cu 4548 camber di hotel den 12 hotel riba un strip di 2 miya, 'tin hopi turista cu tin cu comparti e beach ey'. Mientras cu ta sugeri Eagle Beach tambe cu ta 'menos' popular y cu tin 'solamente' 1179 camber di hotel, e ta keda un beach publico, cu por bira hopi druk toch. Otro islanan riba e lista ta esnan comun manera Puerto Rico, Republica Dominicana, Jamaica, Bahamas, y Mexico. Cada un ta mustra beachnan hopi ocupa y pa 'evita'. Pues Aruba tin un problema di 'luho' cu ta e prijs cu ta paga pa ta un isla 'colma' cu turista. Foto cortesia Oyster.com