Jeanot de Cuba decano nobo Orden di Abogado

ORANJESTAD - Abogado mr Jeannot de Cuba ta decano nobo Orden di Abogado. Ariba 29 di november 2016 e asamblea general di Asociacion di Abogado (“OvA”) di Aruba a scoge un directiva nobo cu awor ta consisti di:

mr. J.M. (Jeannot) de Cuba, Decano

mr. M. Arlene Ellis-Schipper, Vice-Decano

mr.Caroline J. Hart, Secretario

mr. Jurima A.R. Bryson, Tesorero

mr Hose (Jomar) G. Figaroa, Comisario

OvA tin actualmenteun total di 87 miembro y tin como obhetivo: determina y mantene reglanan relaciona cu abogacia, representa, promove y proteha e interesnan di personanan cu ta brindi asistencia legal como profesion, cuido di calidad di e servicio y un bon administracion di husticia. Ademas e statuto di OvA ta encarga OvA cu conserva derechonan humano y asistencia legal adecua. 

ORDENANCIA NOBO

For di algun tempo caba tin un Ordenancia di Abogado nobo diseña, a base di cua OvA, mescos cu na Hulanda, por haña e autoridad pa impone reglanan pa e miembronan, ariba tereno di educacion professional y practica diario den un sentido amplio. E directiva lo haci esfuerso pa pone e Ordenancia aki bek ariba e agenda politico cu e expectativa cu Parlamento lo trata e Ordenancia aki pronto. E directiva nobo tambe lo hinca nan empeño pa yega na un mihor systema di asistencia financerio legal pa esnan di menos recurso den asuntonan penal y alaves civil. 

Finalmente, e directiva lo keda vigila y keda atento ariba e calidad di (aplicacion di) husticia y conserva derechonan humano.