Por paga number di auto 'A' den dos paga solamente awor

ORANJESTAD – Pago pa number di auto plachi A, por haci esaki solamente den dos paga awor, compara cu antes cu tabata den 4 paga, esta pa cuartal. Esaki no ta posibel mas entrante 1 di januari 2017. E ley nobo ta pone cu mester paga number di auto plachi A a bin cu e cambio aki. E ta relaciona cu recientemente Parlamento di Aruba a aproba cambionan importante den ley di impuesto di vehiculo- y boto di motor. 

COBRANSA ADICIONAL

Pa cobra e impuesto di vehiculo- y boto di motor mas eficiente y na tempo, a wordo introduci un sistema di cobransa adicional (naheffingssysteem) cu un boet ora e cliente no paga su impuesto of no paga su impuesto na tempo. Alabes Departamento di Impuesto ta informa cu tin otro cambionan importante cu a tuma lugar den e termino di pago y cu tur e cambionan meniona ta balido entrante 1 di januari 2017. 

INTRODUCCION DI SISTEMA DI COBRANSA ADICIONAL (NAHEFFING) 

Pa cu e ley di impuesto di vehiculo- y boto di motor a wordo introduci un sistema di cobransa adicional (naheffingssysteem). Esaki ta nifica cu si acaso e cliente no paga su impuesto di vehiculo- of boto di motor, inspector por saca un cobransa adicional (naheffingsaanslag) cu un boet di maximo 100% di e suma di impuesto. Esaki tambe ta conta si e cliente a paga un suma menos cu locual e tin cu paga of si e no a paga na tempo. E cobransa adicional mester wordo paga dentro di 1 luna. Si e cliente no paga e cobransa adicional, lo bay over na forsa e cobramento via por ehempel un dwangschrift, ordo di retencion riba salario of ponemento di beslag. 

CAMBIONAN DI TERMINO DI PAGO 

E termino di pago pa e impuesto di vehiculo- y boto di motor a cambia. Den e tabel akibou e cambionan ta wordo illustra. 

Departamento di Impuesto kier urgi su clientenan cu a paga 1 kwartaal so den luna di december 2016 y/of januari 2017 pa pasa paga e di dos kwartaal promer cu 31 januari 2017 manera cu ta stipula door di e ley nobo. 

CARTA DI OBHECION Y RESTITUCION 

Un otro cambio den ley ta cu tur persona cu ta den posesion di un vehiculo- of boto di motor tin cu paga impuesto di vehiculo- of boto di motor, sea ta haci uzo di e caminda publico of awa publico of no. Den e caso cu un termino of boet wordo paga inhustamente, por dirigi su mes na Inspector manera cu ta custumber. 

VEHICULO DI MOTOR CU TIN 30 AÑA OF MAS 

Vehiculo di motor cu tin 30 aña of mas, ta paga segun e cambio di ley e mita di e suma stipula pa e tipo di vehiculo di motor. NOTA: Foto archivo NoticiaCla.com di vocero di departamento di impuesto durante e ultimo conferencia di prensa riba e tema den luna di december 2016.