Den Burger King trahado ta hinca colega cu cuchiu

ORANJESTAD - Un trahado di e establecimento fast food Burger King den Caya Grandi a hinca un colega trahado diamars anochi. Vocero suplente di polis Liliana Rasmijn a confirma e informacion. Tabata den careda di 9'or (9:04pm) cu Centra di polis a manda un patruya cu urgencia pa e sitio. A raporta cu un colega masculino a hinca otro colega femenino cu cuchiu y cu 'lo tin hopi gritamento'. Ora cu polis a yega, polis a tuma nota di e personanan en cuestion, cu ainda tabata den e sitio.  Un cliente a mustra polis den direccion di un homber tras di e counter, cu lo ta e sospechoso. Mes momento a mustra nan riba e cuchiu cu a wordo uza den e caso aki. E cuchiu tabata riba e mesa unda cu tin refresco. A base di e informacion ricibi, polis a pasa pa detene e trahado sospecha di a hinca su colega. Su colega mientrastanto a keda transporta cu urgencia pa hospital cu algun hinca. E caso ta bou di investigacion pero no ta conoci kico e motibo di hincamento tabata. Foto cortesia Nelson "Speed" Andrade.