Gobierno ta confirma ‘toezegging’ hotel Tierra del Sol

ORANJESTAD - Gobierno a duna toezegging na un grupo nobo pa construi un hotel lowrise di 5 strea, cu un maximo di 200 camber den propiedad di Tierra del Sol. E mandatario di turismo Otmar Oduber a confirma esey durante un conferencia di prensa dialuna mainta. E ta un desviacion di e maneho di gobierno, pero debi na un estudio di impacto recien presenta, ta mustra cu mester e hotel pa por garantisa continuacion di Tierra del Sol. E impacto di un eventual bancarota ta funesto pa tanto e trahadonan, esnan cu ta biba eynan y pais Aruba. E hotel di un nivel manera esun menciona, lo no mester tin un efecto negativo riba comunidad di Aruba, segun e mandatario. E ta premira cu lo por dura por lo menos di awo pa 3 aña prome cu e hotel en cuestion ta den operacion.

E grupo nobo aki a haya un lista di condicion cu e tin cu tene su mes na dje prome cu e por construi e hotel. Entre esnan menciona tambe, ta ensera e ubicacion exacto, cu ta e espacio mas zuid oost serca di e otro propiedadnan caba, enves di serca di e frontera cu e laman di Aruba.

E propiedad pa mas di 10 pa 15 aña ta den problema caba, y ta na fin di 2012 e la haya su mes den un situacion cu no tabata casi manehable mas. Un estudio haci algun tempo pasa, a mustra pues cu e unico forma pa mantene Tierra del Sol operacional y solvente, ta door di pone un hotel acerca pa genera suficiente entrada extra. Y ta basa riba e condicion ey, gobierno a opta pa desvia y duna e permiso pa traha un hotel segun e structura menciona.