Gobierno di Aruba tabata na entiero di 'Paps' Capriles

WILLEMSTAD - Aparte di delegacion di Caribbean Mercantile Bank cu a biaha pa Corsou dialuna, tabatin tambe delegacion di gobierno di Aruba cu tambe a biaha pa ta presente na entierro di Lionel "Paps" Capriles dialuna merdia. Fuera di premier Eman, ministernan Arthur Dowers, Benny Sevinger y Paul Croes a biaha pa asina duna ultimo respet pa e bankero respeta di Corsou. "Un gran amigo personal, pero tambe un gran amigo di Aruba" ta e forma con Eman a describi su amistad cu Paps, na NoticiaCla.com dialuna durante e entiero na Corsou. 

RELACION CU PAPS

Segun Eman, no solamente cu 'Paps' tabata dunabo conseho di hopi balor pa su conocemento y trayectoria y experiencia, pero tambe un persona cu un personalidad humano hopi hopi grandi. "Den e sala di e cas aki mi tabatin diferente oportunidad durante bishitanan na Corsou pa haci un stop serca dje. E tabata fragil caba di salud pero semper cordial y hospitalario pa ricibimi" Eman a bisa. A sinta momentonan hopi placentero. Eman a confirma cu Paps tabata hopi amigo tambe di su ruman homber grandi Henny tempo cu e tabata prome minister di Aruba. "Un persona cu hopi atencion pa tur loke ta pasa na Aruba y semper cu bon conseho hopi grandi. 

KICO TA PONE TUR HENDE STIMA PAPS

Segun Eman, e motibo cu tur hende tabatin un aprecio asina grandi pa Paps, ta pasobra cu -banda e hecho cu e tabatin un vision grandi pa e aspecto comercial di e banco, semper e tabatin un vision tambe pa nos islanan. "Semper tabatin pensamentonan con miho por siribi nos islanan. E tabata hopi vocal pa expresa su ideanan pero tambe pa dunabo su pensamento mas serca" Eman a sigui bisa. Fotonan cortesia Nelson "Speed" Andrade.