Entiero Lionel 'Paps' Capriles grandi e impresionante

WILLEMSTAD - Conocido bankero y personalidad di Corsou Lionel "Paps" Capriles a wordo hiba na su ultimo lugar di sosiego. Manera por a spera, e entiero a bira un evento completamente coordina, sin laga niun pida detaye afo. Impresionante tabata e candidad di personanan cu a bin dispidi, y tambe e logistica rond di esaki. Aruba no a falta y un delegacion respeta tabata presente pa rindi honor y tributo na un homber cu tur a cataloga como un 'shon di hende', un 'persona unico' y asina tabatin mas. Organisa na su residencia na Doormanweg mes, tur esnan presente a haya chens amplio pa dispidi di Paps, y recorda momentonan bunita cu Paps a laga atras pa recorda. NoticiaCla.com tabata parti di e delegacion di Aruba y a cubri e entiero aki tambe.

DELEGACION ARUBA

Un delegacion di amigo, coleganan y representantenan di Caribbean Mercantile Bank (banco cu Paps a funda mas di 50 aña pasa) a biaha den varios buelo priva dialuna mainta pa Corsou, pa asina ta presente na e momento special y tristo aki. For di Prome minister Mike Eman, te na Javier Wolter Managing Director di CMB, miembronan di e hunta di directiva, y claro, su amigonan di Aruba manera ex gobernador Olindo Koolman, Jossy Lacle y Eduardo de Veer y un lista mas di personalidadnan di Aruba. Asina tabatin mas cu aunke algun tabatin un rol ehecutivo of no, nan tur a sinti cu tabata nan deber civico y di amistad, pa duna honor final na nan amigo Paps. 

E ATARDI

E entierro tabata na residencia di 'Paps' mes na Mahaai, unda cu a organisa e residencia di tal forma cu a pensa riba literlamente tur cos. Anticipando un avalancha di bishita, a percura pa e 'evento' cana structura, completo cu persona pa dirigi caminda, post pa awa mitar caminda, te na un post di Cruz Cora en caso cos bay for di man y hende bira malo di sea cansancio, calor of otro cos. For di tur rango, disciplina y skina, hendenan a bin mustra nan respet pa e homber cu ningun hende por a haya algo negativo di bisa di dje. Keda pendiente pa mas di e cobertura di entiero di Lionel "Paps" Capriles. Mira un recapitulacion di e dia den forma di video aki.