SMAC: Fakkel tabatin mas di 7200 participante den 7 grupo

ORANJESTAD  - Manera NoticiaCla.com a relata caba, diasabra ultimo tabatin e prome parada di aña pa temporada di carnaval 2017. E fundacion cu ta organisa esaki, SMAC a relata cu nan ta haya cu e tabata un salida hopi exitoso cu e prome parada cu ta e Parada di Flambeu.  E prome parada di 2017 a habri cu un fiesta carnavalesco cu mas di 7200 participante riba pia, parti riba 7 diferente grupo di carnaval y un publico grandi riba ruta, canto di caminda.

Cu cendemento di Flambeu pa 8or di anochi, pa Minister President Mike Eman conhuntamente cu Sra. Shannon Henriquez, presidente di SMAC, simbolicamente a inicia e Parada di Flambeu. A logra saca e parada na tempo y den manera ordena.

SMAC ta gradici e publico carnavalesco y tur esnan cu a participa pa un tremendo Parada di Flambeu den cual e comportacion tabata hopi bon.  Mester menciona cu e parada a wordo habri cu musica di asambeho di Quality Brassband, bailarin y tambe Sr. Jairo Le Grand cu su roadpiece mahestuoso ganador di aña 2016. 

Por a nota cu varios grupo di carnaval a subi caminda cu carosa y flota cu bailarin y reinanan tambe. Es mas, participantenan a haci lo maximo pa briya cu nan trahe pa Parada di Flambeu, lus y briyo no tabata haci falta ariba e anochi aki y ta sigur cu a impresiona publico y bishitantenan di nos isla alabes.

Presidente Shannon Henriquez, na nomber di SMAC kier a manda un danki special na e team di voluntario di SMAC y tambe na KPA pa e sosten y e parti tan importante di orden publico.  Organisacion di e fiesta cultural mas grandi di Aruba ta rekeri hopi cooperacion entre diferente instancianan y SMAC  ta agradecido pa tur ayudo y sosten brinda di nan banda.

E agenda di SMAC ta continua e fin di siman venidero cu Elecion di Prins y Pancho ariba diasabra 14 di januari na Aruba Entertainment Center y cu Parada di Blaas ariba diadomingo 15 di januari na San Nicolas.  Pa cualkier informacion regardando inscripcion of participacion na cualkier di e elecionnan of actividadnan por jama libremente na 5831800 entre 3or pa 9or di anochi. Oficina di SMAC ta keda na Weststraat 7, Unit 6.